Mizoram International Short Film Festival ; Mizoramah ka lo kir leh ang - Gulshan
Bollywood star Gulshan Grover chuan, "A vawi khatna atan Mizoram ka lo kal a, ka lo kir leh ngei ang," a ti.
Bollywood mai bakah Hollywood thlenga hnuhma nei lian tak Gulshan hi Mizoram International Short Film Festival hawnnah a lo tel a, festival hi Ningani tlai khan Aijal Club-ah hawn a ni. He hunah hian ama film siam thar 'Forbidden' chu chhuah nghal a ni a, India rama an chhuah hmasak berna a ni.
'Bad Man' tia hriat hlawh tak Gulshan chuan, "Mizoram ka lo luh tirh aṭangin a nuam ka ti nghal a, airport-a ka lo ṭum chiah aṭangin ka hlim hle a... airport aṭanga Aizawl panna kalkawngte kha a nuam ka ti a, mipuiin hlim hmel pu takin min lo lawm thiam a, a nuam tak zet a ni," tiin a sawi.
Film 400 chuanga inlan tawh, khawvel ram hrang hranga hnuhma lo nei tawh chuan, "Indian zingah ram hrang hranga film lama hmasa ber nihna ka nei ve nual a, tawn hriat pawh ka lo nei ve nual tawh... tunah hian Mizoram hian film siam kawngah talent in nei ṭha tih ka rawn hmu a, Mizo ṭawnga in film siamte hi English-a a thu dah chuan khawvel hmun dangin an en duh turin a siam theih a ni," tiin, Mizo flim te pawh zau zawka tihchhuah theih a nih thu a sawi.
Gulshan chuan Mizorama lo kir leh ngei a tum thu a sawi a, film lama Mizo te talent neih chu khawvel huapa pho chhuah a nih theihna tura film festival siam a ni chu lawmawm a tih thu a sawi bawk.
He short film festival-ah hian khawvel hmun hrang hrang aṭangin film 82 a lut a, India ram pawn aṭanga lut a awm bakah Mizoram aṭangin mi 25-in an film siam an thehlut a ni.