Paul McCartney a ropui ; Kum 36 hnuah Billboard 200-ah No.1 a hauh

Kum 76 mi zet a ni tawh a, Mizo pa chu nise ni lum ai mai mai tawh tur a ni! Chutih lai chuan British singer ropui Sir James Paul McCartney chuan a album thar 'Egypt Station' hmangin, kum 36 hnua a vawi khat nan Billboard 200 chart-ah No.1 a hauh leh ta.

English rock band lar The Beatles star hian September 7 khan album thar 'Egypt Station' a tichhuak a, a hit rem rem hle. He album hmang hian Billboard 200 chart-ah a inlar leh mek a, tunlai album hralh kal ber a ni.

Paul McCartney-a solo studio album 18-na 'Egypt Station' hi hralh a kal rem rem hle a, kar khat chhungin copy 153,000 zet an hralh chhuak a ni. Album a tichhuah tawh zinga Billboard chart-a No.1 hauh rang ber a ni bawk. No.1 a hauh tur thu hi kartir lam khan a chiang tawh a, official-a tichhuah a ni ta a ni.

Record ropui

British singer McCart­ney hi Billboard 200 history-a No.1 hauh thei inkar hla ber dawttu a ni a, American singer Johnny Cash chiah tluk loh a nei. No.1 a hauh inkarah hian kum 36 zet a tla a, Johnny Cash record kum 36, thla 10 leh ni kua chu a hnaih hle a ni.

McCartney hi music huangah chuan sulhnu nei ṭha ber zinga mi a ni a, band leh mimal ang­in hlawhtlinna ropui tak a chang thei a ni. The Beatles-a a record ropui zia sawi nawn a ngai lo a, solo lamah pawh record tam tak a hnut chhiah tawh a ni.

McCartney album hnu­hnung ber chu kum 2013-a a tihchhuah 'NEW' kha niin, kum eng emaw zat hnuah 'Egypt Station' a rawn larpui leh mek a ni.

Companion of Honour

Paul McCartney hi Bri­tish lal chungkuain an thuneihna huam chhunga chengte hnena chawimawina an pek ṭhin 'Order of the Companions of Honour' chu kumin May thla khan hlan a lo ni tawh a, hemi pual hian Buckingham Palace-ah hun buatsaih a ni. He chawimawina pawh hi music huanga a thawh hlawk avanga hlan niin, Queen Elizabeth-i'n knight nihna a pek hnu kum 20-ah he chawi­mawina hi a dawng a ni.