British rock band Wolf Alice kutah Mercury Prize
United Kingdom leh Ireland-ah khuan kumtin album ṭha ber thlan ṭhin a ni a, a hmingah 'The Mercury Prize' tih a ni. Ningani khan Eventim Apollo-ah Mercury Prize hi sem a ni leh ta a, British Alternative Rock Band, Wolf Alice chuan chawimawina hi an dawng a ni.
Wolf Alice hian an studio album pahnihna 'Visions of a Life' hmangin Mercury Prize 2018 hi an la a, pawisa fai £25,000 an dawng tel a ni. An band singer Ellie Rowsell chuan, "Hlawhtlinna ropui tak a ni a, kan lawm takzet a ni. Kan zai ngainatute chungah lawmthu kan sawi tak meuh a, he chawimawina hi an tan kan hlan a ni," a ti. Ellie Rowsell chuan a bandmate te chu a fak hle bawk.
Wolf Alice band hi a tirah chuan member pahnih chauh an ni a, kum 2012 khan band angin an perform ṭan a ni. Tunah hian member paruk - Ellie Rowsell, Joff Oddie, Joel Amey, Theo Ellis, Sadie Cleary leh George Barlett te an awm mek a ni. Chawimawina dawng tur hian member pali an thawk chhuak a, mipui lawm an hlawh hle.
Mercury Prize hi British Phonographic Industry leh British Association of Record Dealer te chuan a vawi khat nan kum 1992 khan an sem chuak a, kumtin sem a ni zui ta a ni. A tirah chuan Mercury Music Prize tih a ni a, UK leh Ireland-a album ṭha ber thlanchhuah hnenah hlan ṭhin a ni.