Captain Marvel trailer a hit

Nakkum March thla-a tlangzarh tur Captain Marvel chu Thawhlehni khan a official trailer tihchhuah a ni ta a, a hit nghal rem rem hle. American actress Brie Larson leh British actor Jude Law te channa trailer hi darkar khat lek chhungin mi maktaduai 109 chuang zetin an en a ni.

He fantasy/adventure film siam nana an budget chu $mtd 152 a ni a, American film director Ryan Fleck leh hmeichhe film director lar Anna Boden te kutchhuak a ni. Captain Marvel hi movie trailer chhuak tawh zingah darkar khat chhunga entu ngah lamah 11-na a ni a, Avengers: Infinity War a pha lo hle. Kumin April 27-a tihchhuah Avengers: Infinity War hi darkar 24 lek chhungin mi maktaduai 230 chuangin an en a, record a ni.

Drama/Mystery film 'IT' chu pahnihna niin, viewer maktaduai 197 zet a nei. Social media platform - YouTube, Facebook leh Twitter aṭanga darkar khat chhunga entu ngah lamah hian Avengers: Infinity War Official Trailer 2 chu top 3-ah a lang cheu bawk a, mi maktaduai 179 zetin an en a ni.

Thor: Ragnarok, Beauty and the Beast, Star Wars: The Last Jedi leh Star Wars: The Force Awakens te chu viewer ngah zual zingah an lang bawk a, Captain Marvel pawh movie hit ber ber huangah a inhangkai a ni.

Captain Marvel hi nakkum March 8 khian US-ah tlangzarh a ni ang.