Mizoramah lo kal fo ka tum - Lily Darnei
Halflong nula Lily Lalremkimi Darnei chuan Mizoramah lo chuanchhuah fo a tum thu Vanglaini palai a hrilh.
Miss Mizoram 2018 aṭanga Zoram mipuiin kan hmelhriat Lily hi World Bamboo Day hmangin Aizawl-ah a lo kal a, Mizoram International Short Film Festival a chhim nghal bawk.
Lily Darnei chuan, "Aizawl hi nuam ka ti a, lo kal fo pawh ka duh a ni. Zirlai ka la nih avangin hun awl ka nei meuh lo a, chuti chung chuan a tam thei ang ber lo kal hi ka duh a ni," tiin a sawi. Lily hian St. Edmund's College, Shillong-ah college a kal mek a, graduate turin kum hnih vel a la mamawh. Heti chung hian a tuina modeling lamah theihtawp chhuaha inhman zel a tum thu a sawi bawk.
Miss India Mizoram 2018, Lily Lalremkimi Darnei hi Miss Mizoram thlanna-ah khan mipui lawm hlawh ber zinga mi niin, Femina Miss India thlannaah Mizoram ai a awh zui bawk a ni.