Mizo Idol 2018 ; September 28 zanah Mizo Idol a hriat dawn

Mizo Idol Season 6 chu a hmawr­bawk a hnai ta hle a, September 28, Zirtawpni zanah chuan Mizo Idol 2018 a hriat tawh dawn a ni.

Kar hmasa Zirtawnni zan, September 21 khan top 4 result puan a ni a, Zemabawk nu­la Immanuel Lalawmpui chu thlah liam a ni ve leh ta. Top 3-ah hian Ticos Darhmingthanga, H. Lalnunsiami leh Jerry Lalrinawma te an tling a, hemi zan vek hian intihsiak hnuhnung an hmachhawn zui nghal a ni.

Mangṭha Teawm!
September 21, Zirtawpni zan khan top 4 result puangin, Zemabawk nula Immanuel Lal­awmpuii (Teawmi) chu top 3-ah a inhlangkai zo ta lo a ni. Teawmi hian top 4-ah khan Tribal Power hla hit 'Dolma' tih chu a sa a, a zai ṭha hle. Mahse a taksa a fit tawk loh avangin ṭum dang a pha lo deuh niin endiktuten an sawi a, intihsiak a nih miau avangin ui tak chunga mangṭha a ngai ta a ni.

Beidawng duh lo
Teawmi hi zaithiam dang te ang bawkin vawi eng emaw zat a lo hlawhchham tawh a, mahse a beidawng duh lo. Chu chuan tun hun hi a hruai thleng ta a, tunah chuan Zoram mipuiin tunge a nih an hre tawh a ni.

Praise On leh Youth Icon-ah te a lo tel tawh a, Mizo Idol-ah pawh ṭum hnih a telna a ni tawh! Mizo Idol hnuhnung berah khan telin top 50 a thleng a, hriat a hlawh zui lem lo. Mahse beidawng duh loin Mizo Idol Season 6-ah a tel leh ngat a, a tum ram thleng zo lo mah se Zoram mipui hmaah a theihna san zia a pholang ta a ni. Tun din­hmun thleng tur hian a bei nasa hle a, theihtawp a chhuah a ni.

Music video nen
Mizo Idol-a a zinkawng chu tawp ta mah se rimawi khaw­velah chuan nasa zawkin inhman chhoh a tum. Teawmi hian kumin chhung ngeiin music video tihchhuah hman a tum a, "Mizo Idol intihsiak boruakte han zo se ka buaipui ṭan ang," tiin a sawi.

Tunah hian YouTube channel a buaipui mek a, hun reilo teah chuan duh hun hunah a zai en leh ngaihthlak tur a awm dawn a ni. Immanuel Lal­awm­puii hian amah buaipuitu leh duhsaktute chungah lawmthu a sawi a, Zonet Chhungkaw chungah thinlung takin lawmthu a sawi bawk.

Hmeichhe Idol kan nei dawn em?
Mizo Idol Season 6-ah hmei­chhia an lansarh thu kan sawi fo tawh a, a tawp khawkah enge an an dawn hriat a chakawm tawh hle. Teawmi thlah liam a ni tawh a, H. Lalnunsiami (Mami) chu Idol ni thei awm chhun a ni tawh. Champhai nula Mami hi dinhmun ṭha takah a ding mek a, a elpui ber nia lang chu Chanmari tlangval Jerry Lalrinawma a ni.

Top 3 intihsiakah Chhinga Veng tlangval Ticos Dar­hming­thanga a che ṭha tawk lo a, beisei bo erawh a ni lo. Chutih rual chuan Jerry-a leh Mami te an che ṭha a, anni pahnih hi Mizo Idol ni thei tura rinkai pawh an ni.

Jerry The Boss!
Jerry Lalrinawma'n dawhsana a lawn tawh chuan mipui thawm a ring em em zel a, amah ṭantu ten 'Jerry The Boss' tih inziahna banner an lo vai suau suau zel bawk. Chanmari Veng mipuiin Mizo Idol title kawl an duh a, chumi tur chuan an thawk chhuak ṭha thei hle.

Aizawl-in Mizo Idol kawl an duh a, chumi tur chuan Jerry-a hian kawng dik a zawh pui mek bawk. Zirtawpni zana result puan a nih hunah engkim a chiang dawn.

Jerry-a hian top 3 intihsiakah khan 'Ka chan hi' tih leh, 'Engtin' tih hla a sa a, ṭum dang ang bawkin judge-te'n an fak leh hle. Chanmari Veng mipuiin Mizo Idol thar an lawm luih luih a nih pawhin a mak lo ang!

Ticos a pawi!
Chhinga Veng innghahna Ticos-a chu a vawrtawpah beisei angin a che ṭha tawk lo a, a tum ram a thleng zo ang em tih chu zawhna a ni. Ticos-a chetsual hun hi a fuh lo tak zet a, chutih rual chuan mi tam tak Idol a ni tawh tho a ni! Kum naupang te ni mah se theihna sang tak a nei a, rimawi khawvelah a hma bak a eng tak zet a ni.

Show ṭum hnih
Naktuk zan leh Zirtawpni zan hian show neih a ni dawn a, intihsiak a awm tawh lo ang.

Zirtawpni zan hian result puan a ni dawn a, Mizo Idol 2018 kan hre tawh dawn. Mizo Idol hian Rs. 1,50,000 bakah Scooter a dawng dawn a, pahnihna leh pa­thumna ten Rs. 80,000 leh Rs. 50,000 an dawng dawn bawk. Top 6 te khan Rs. 15,000 an dawng a, top 11 te khan Rs. 10,000 ṭheuh an dawng bawk a ni.