Bethsy-i'n hla thar 'Nang chawimawi nan' a tichhuak

Zofate'n a zai kan ngainat em em Bethsy Lalrinsangi chuan hun eng emaw chen hla thar a tichhuah tawh loh hnuah hla thar mawi tak 'Nang chawimawi nan' nen a rawn kir e.

'Nang chawimawi nan' hi Zohmaa Jahau phuah a ni a, a thluk erawh Sanga Renthei siam a ni. Lal K Sailo chuan music siamin, recording chu Melody Recording studio kutchhuak a ni thunga, video chu AKima Chhakchhuak siam a ni bawk.

Bethsy hla thar hi MDM Library lamah register tawh niin Zonet Cable TV lamah tihchhuah a ni tawh a, ṭhenkhat chuan kan thlirin kan ngaihthlak tawh a rinawm. Nizan lamah khan duh hun huna hmeh chhuah theih turin Bethsy hian a YouTube channel lamah a dah chhuak tawh bawk a ni.

Audio Streaming Platform hrang hrangah Bethsy hian a hla thar hi a chhawp chhuak tawh bawk a, Bethsy zai ngainatute tan chuan ngaihven ran chi a ni ang.

"Pathian min hruaina avang leh ka pasal leh ka chhungte, kawng engkima min tuipuia min support-a, min backup tlattute avang liau liaua puitlin thei ka ni a, an chung ah hian ka läwm takzet. Vawiin thlenga ka zai min lo ngaihthlak sak a min lo ngaihhlut saktute zawng zawng chungah pawh lawmthu ka sawi bawk e," tiin Bethsy chuan a lawmthu a sawi a ni.