Science & Environment ; Khawvelah thingkung chi; rin dan hmasa aiin a tam

Zirchianna thar aṭanga a lan dan chuan rin dan hmasa aiin khawvelah hian thingkung chi (species) 14% laiin a tam zawk a, chung zinga chi eng emaw zat chu vang tak leh awmna bik nei an nih thu mithiamte chuan an sawi.

Data hrang hrang an lakkhawm aṭanga 'estimate' an siam thar hi scientist-te chuan a rintlak tak zet tih an sawi nghe nghe a, 'estimate' an siama species 73,300 zinga 9,200 chu la hmuh chhuah loh niin an ngai a ni. Thingkung chi vang tak takte chu tropical forest-a awm an nih thu leh ramngaw tihchereu avang leh sik leh sa inthlak danglam nasat avangin thingkung tam tak chu an mang chak hle niin an sawi.

Khawvel hmun hrang hranga ramngaw 'plot' 1,00,000 aṭanga thingkung maktaduai tel fe an zirchianna aṭangin data an siam a, 'statistical technique' hmangin estimate chu an siam a ni.

University of Minnesota, St Paul-a lead researcher Dr Peter Reich chuan,"Kan data thar hian khawi hmun nge 'biodiversity' tihchhiata a awm mek tih kan chhut thei dawn a ni. Tunah chuan South America, Africa, Asia, leh Oceania tropic leh subtropic-ahte a thleng mek a, chung hmun chu species vang tak tak awmna a ni lawi si," tiin a sawi.

Tuna zirchianna an neihah hian ram hrang hrang aṭangin zirmi 140 chuang an inhnamhnawih a, Proceedings of the National Academy of Sciences journal-ah an zirchianna hi an tarlang a ni.