October 2 zanah Mizo film thar 'LBN' tlangzarh dawn
Kristian Ṭhalai Pawl, Kulikawn West Branch ten kum hnih dawn an lo buaipui tawh, Kristian film ‘LBN’ chu October 2 zan hian Vanapa Hall-ah an tlangzarh dawn ta.
He film kalphung tur hi a tunlai viau dawn a nih hmel a, a changtupa Tetea chu journalist a ni. Tetea hi LBN Cable TV-a thawk niin, a hna leh politics inkungkaih tak kara nghet taka a din theih dan tarlanna film a ni.
A hna thawh avanga LBN Cable TV-in a hmingṭhat phah dan te chu tarlan niin, tunlai inthlan boruak nen pawha inmil tur tak politics lam pawh tarlan a ni.
Production lam
'LBN' film hi Siama Video Production (SVP) kutchhuak a ni dawn a, ani hi director a ni nghal bawk. Siama hi videography-a sulhnu neiṭha ber te zinga mi niin, music video leh film siam lamah chuan tawnhriat ngah tak a ni.
Background music mawi tak a awm dawn a, rimawi lama sulhnu nei ṭha tak - Ronald Sangtea leh K. Hminga te kutchhuak a ni. Original soundtrack hi K. Hminga phuah niin, a thluk pawh hi ama siam a ni.
He film hi Zoram hmun hrang hrangah chhuah tum a ni a, pawl leh mimal angin sum tuak nan a hman theih dawn. Hemi chungchang hrechiang duh tan phone number - 9892376560 /9862331530 / 8131984506-ah te hian zawhfiah theih a ni. Tlangzarh zan hian chhuah nghal a ni dawn a, heng dawrah te hian ticket lei theih dawn a ni :
Dolphin Communication, Bazar
RAW Digital, Chanmari
HM Business Centre, Mission Veng
The Pet Division, Kulikawn