Tommy L Pachuau 'Lungrunpui' pakhatna a ni
Ṭhazual Lengzem chart-ah roreltu thar an awm a, chu chu tudang ni loin Tommy L Pachuau niin a hla 'Lungrunpui' hmangin No.1 dinhmun a rawn hauh a ni. Marina Vanhriatpuii Varte 'Awithangpa hla' chu pahnihna a ni a, Michelle Varte 'Chawngtinleri' chu pathumna a ni bawk.
'Sensiari' star Tommy L Pachuau No.1-ah
'Sensiari' tih hming lam rik hi chuan Tommy L Pachuau hi rilrua lo lang hmasa ber zinga mi a ni ve reng ṭhin. 'Sensiari' film lar vanglai aṭang tawha Zoram khawvelin a hriat lar tawh Tommy L Pachuau chu a la chuai lo a, a hla la thar tak mai 'Lungrunpui' chu Ṭhazual Chart-ah pakhatna a rawn nihpui a, hei hian a la chuai loh zia a tilang chiang awm e.
'Lungrunpui' music video hi YouTube lama thlir theih turin February-ah khan a dah chhuak tawh a, music video-ah hian tunlai tleirawl zinga tlana tak Mizo Idol star Ticos-a pawh a inlan a, thlir manhla tak a ni.
'Lungrunpui' hi amah Tommy L Pachuah phuah hi a ni nghe nghe a, ama style, a aw mil tur taka a phuah a ni bawka Ṭhazual Chart-a a rawn hit chho pawh hi a mak lo hle.
Varte pahnih an invawrh
Mizo Idol aṭanga Mizo mipuite'n kan hriat lar, Mizo rilrem zawng tak hla hmanga Zoram mipui thiam taka min awi ṭhintu Marina Vanhriatpuii Varte 'Awithangpa hla' chu pahnihna a ni a, chart hmasaah khan parukna niin tun ṭumah erawh pahnihnaah a rawn inhlangkai der tawh.
Michelle Varte pawhin a hla thar mawi tak, music video changkang bawk si hmangin Ṭhazual Chart a rawn run mek a, pariatna aṭangin pathumnaah a rawn invawrh pui dawrh mai bawk. Marina leh Michelle-te hi dinhmun sang bera ding tur pawhin hmabak an nei eng hle a ni.
Mimi leh Mama ve thung
Chart-a No.1 pawh lo ni tawh Mimi Remruatsangi 'Vul zel rawh aw' chu palinaah a awm ve thung a, Mama Fishtail chuan 'Kan damchhan' hmangin Top 5 a khar ve bawk a ni.
ṬHAZUAL LENGZEM TOP 10:-
1 Tommy L Pachuau - Lungrunpui
2 Marina Vanhriatpuii Varte - Awithangpa hla
3 Michelle Varte - Chawngtinleri
4 Mimi Remruatsangi - Vul zel rawh aw
5 Mama Fishtail - Kan damchhan
6 Rualthana - I tan
7 Eddie Pachuau - Lairil hmangaihna
8 Rohlupuii - Her sual lo
9 Didika Chhakchhuak - I bei reng si
10 Fela Colney & Temami - Beisei bo