Sushant Singh Rajput channa Dil Bechara trailer tichhuak

A thihnain Bollywood boruak nasa taka a nghawng mek karah Sushant Singh Rajput film chan tawpna ber Dil Bechara trailer chu nimin khan tihchhuah a ni a, Sushant Singh-a fan-te chu lungchhe tak chung siin an phur tawh hle.

Dil Bechara hi Hollywood lamah pawh film lar tak 'The Fault In Our Stars' nen khan a inang dawn a,  John Green lehkhabu, kum 2012-a bestseller 'The Fault In Our Stars' behchhana siam tho a nih avangin a danglam tamin a rinawm lo.

Ruahmanna hmasaah chuan May 8 khan tlangzarh an tum a, mahse hruipui a len avangin tlangzarh hun an sawn hla leh a, Disney Plus Hotstar-ah digital-a tlangzarh a ni dawn ta zawk a ni. July 24 hian tlangzarh a ni tawh dawn a, director Mukesh Chhabra chuan social media-a hemi chungchang a tarlannaah hian lungchhe takin a ṭhian ṭha Sushant tel loa film tlangzarh a ni tur chu a rin ngai loh thil a nih thu a sawi.

Film poster a tarlannaah chuan, "Sushant kha direc­tor ka nih anga ka film siam hmasa berah hero a ni mai lo a, ṭhian ṭha tak harsa tak karah pawha ka bula ding reng ṭhin a ni. Kai Po Che aṭanga Dil Bechara thleng hian ṭhian ṭha tak kan ni reng a, ka film hmasa berah a tel ang tih min tiam a ni. Ruahmanna tam tak kan siam dun a, duhthusam tam tak pawh kan nei, mahse a tel loin he film hi ka tlangzarh ang tih ka ring ngai lo," tiin a sawi. Sushant Singh Rajput hi June 14 khan Mumbai-ah a inawkhlum a, a thihna hi a fan-te chuan an tuar thiam lo a, Bollywood boruak pawh nasa taka nghawrnghingin 'nepotism' leh a chheh­vel chuan vawiin thleng hian sawi zui a la hlawh hle a ni.