Roreltu thar 'The House' The Predator-in beisei phak lo
North American Box Office-ah roreltu thar a awm leh ta a, chu chu 'The House With a Clock in Its Walls' a ni. Hetih lai hian Olivia Munn leh Keegan-Michael Key te channa 'The Predator' chuan beisei a phak lo a, top 5-ah a lang phak ṭawk.
September 20-a tlangzarh 'The House With a Clock in Its Walls' hian $mtd 26.8 a lalut a, tlangzarh karah No.1 a hauh nghal. He thriller/fantasy sum lakluh hi film 'hit' dangte nena khai khian chuan a tam lo hle a, a siam nana an senso chu $mtd 40 a ni.
He film-ah hian Australian actress Cate Blanchett chu a changtunu ber niin, kum 12 mi Owen Vaccaro chu a langsar viau bawk. Daddy's Home star, Owen Vaccaro hi kum naupang te la ni mah se film khawvelah chuan a mikhual tawh lo hle a, film eng emaw zat a lo chang tawh a ni.
Drama/thriller film 'A Simple Favor' chu sum lalut tam pahnihna a ni a, 'The Nun' chuan a dawt. 'A Simple Favor' hi September 14 khan tlangzarh a ni a, Box Office aṭanga a sum lakluh tawh zawng zawng chu $mtd 32.6 a ni.
The Predator UK Box Office-ah The Predator a hit
September 13-a tlangzarh 'The Predator' hi UK Box Office-ah chuan a hit hle a, North America lamah erwh beisei a phak lo. Kar liam ta chhung khan $mtd 8.7 a lalut a, sum lalut tam palina a ni. Box Office aṭanga a sum lakluh tawh zat hi $mtd 40.4 a ni a, a siam nanaan sum sen ral $mtd 88 pawh a la hmuchuak lo a ni.
Hetih lai hian American film star Olivia Munn leh Keegan-Michael Key te channa The Predator hian UK-ah chuan No.1 a hauh mek thung. He film hi tun hnaia film chhuak thar zingah chuan ngaihven hlawh ber pawl a ni a, khawvel ram hrag hrangah chhuah chhoh mek a nih avangina sum lakluh hi a pung chho zelin a rinawm.
Top 10
Box Office-a hun rei tak hmun pawimawh luah tawh Crazy Rich Asians chu sum lalut tam zingah atel zui zel a, kar liam ta chhunga a sum lakluh zat chu $mtd 6.5 a ni. Box Office aṭanga ringawt a sum hmuhchhuah tawh hi $mtd 159.4 a tling tawh a ni.
White Boy Rick, Peppermint, Fahrenheit 11/9, The Meg leh Searching te chu top 10-ah hian an lang bawk. Tun weekend-ah khan US lamah sum che a tam lo a, an sum lakluh pawh ṭum dang angin a sang lo hle a ni.