Instagram co-founder Systrom leh Krieger an bang

Instagram co-founder pahnih - Kevin Systrom leh Mike Krieger te chuan company aṭanga banna an thehlut a, tun kar chhung hian an chhuahsan fel hman rin a ni.

Systrom chuan, "Kei leh Mike te hian company tan kum riat zel theihtawp kan lo chhuah dun tawh a, Facebook te nen kum ruk kan lo thawkho tawh bawk. A tira mi 13 lekin an hman kha tunah chuan mi maktaduai tam takin an hmang tawh a, khawvel ram hrang hrangah office kan nei tawh bawk. Tunah chuan kan tih tur kan hlenchhuak tawh a, chona thar kan hmachhawn a hun tawh a ni," tiin a sawi.

Facebook CEO Mark Zucker­berg chuan, "Kum ruk chhung zet kan lo thawkho tawh a, an hnen aṭang hian thil tam tak ka zir chhuak a ni. An talent ṭhat zia hmuh hmaih chi a ni lo a, thil thar ṭha tak an tichhuak leh ngei ang," tiin, Systrom leh Krieger te chungchang a sawi.

Kum 34 mi American entrepreneur, Sys-trom leh Brazilian entre-preneur, Krieger (32) te hi Stan­ford University aṭanga inchhar an ni a, October, 2010 khan Instagram hi an hmuchhuak a ni.

Tunah chuan khawvela social media application lar ber te zinga mi a ni der tawh. Facebook chuan kum 2012 khan Instagram hi $tld 1 (£mtd 760) zetin an lei a, Systrom leh Krieger te hi an chhawr zui a ni.

Systrom hi Chief Executive Officer (CEO) niin, Krieger hian Chief Technical Officer (CTO) hna a thawk bawk. Instagram dintuten company aṭanga banna an thehlut hian media khawvel a dengchhuak hneh hle a ni.

Instagram hi khawvela thla­­lak leh video post darhna application lian ber pawl niin, tunah hian mi tluklehdingawn khat chuangin an hmang mek a ni.