UN General Assembly-ah BTS

United Nations (UN) chuan Thawhṭanni aṭang khan General Assembly vawi 73-na chu an ṭan ta a, he hunah hian Korean Boy Band BTS te chu an inlan mauh mai. BTS hi K-Pop group zinga UN General Assembly-a inlan thei hmasa ber an ni a, record thar an siam leh ta a ni.

New York City-a khawmpui lianah hian BTS te hi minute thum chhung thusawina hun pek an ni a, ṭhalaite hnena thuchah ṭha tak an auchhuahpui a ni. BTS hi UNICEF chuan global partnership atan an thlang a, UN General Assembly-ah pawh hian campaign-na hun siam sak an ni. UNICEF nen ṭangkawp hian nikum November thla aṭang khan 'Love Myself' campaign an lo kalpui tawh bawk a ni.

Member pasarih awmna BTS hi kum 2013-a din chauh kha niin, tunah chuan music khawvel an dengchhuak der tawh. Social media lamah pawh an lar hle a, Instagram-ah ringawt pawh follower makdatuai 13.3 chuang an nei tawh a ni.