Mizo Idol 2018 ; Top 11 te show-ah an che ṭha ; Zirtawpni zanah Mizo Idol a hriat dawn

Mizo Idol Season 6-a top 11 te chuan Thawhlehni zan khan show hmuhnawm tak an nei a, an che ṭha tlang hle. September 28, Zirtawpni zan hian Grand Finale show a awm leh dawn a, Mizo Idol puan a ni tawh ang.

Thawhlehni zanah hian top 11 te chuan an talent neih ṭhatzia an pholang nawn leh a, intihsiak boruak tel loa an perform chu hmuhnawm tak a ni.

Mizo Idol ni thei dinhmuna awm mek mi pathum - Ticos Darhmingliana, H. Lalhmunsiami leh Jerry Lalrinawma te pawh an perform a, Mizo Idol atana awhawm tak tak vek an ni.

Show hmuhnawm...
Ruallung nula Lalduhawmi (Awmawmi) chuan fuh takin bul a ṭan a, "Van nuamah chuan tute nge cheng' tih hla a sa. Champhai nula Mami chuan 'Isua lal ber a ni' tih hla a sa a, entu mipui rilru a hneh hle. A incheina a inhmeh a, a zai pawh hmuh a nuam hle a ni.

Darlawn tlangval aw sial tak mai Andrew K. Lalchhan­dama chuan 'A ruk tein' tih hla hmangin mipui a awi a, Chawnpui nula R. Lalmalsawmi pawhin thiam takin, 'Zawlkhaw Di tleitir' tih hla a sa ve bawk.

Manipur aṭanga Mizo Idol tihlawhtlingtu Morris Haulien chuan Zoram ngaih hla a sa ve bawk. Top 6 aṭanga tla ta Malsawmdawngkimi chuan 'Tunge' tih hla hnehsawh takin a sa a, mipui thawm a ṭha hle.

Top 3 inhlangkai thei leh Mizo Idol hial la ni thei Ticos-a'n Dream Hunter hla 'Min hlan rawh' tih hmangin a theihna san zia a pho chhuak ve bawk. Ticos-a hian lawm a hlawh hle a, Mizo mipuiah a tlana tak zet tih a lang chho zel.

Chanmari West tlangval Peter Lalnunpuia chuan, 'Chhawr­­pial run' tih hla a sa a, Zemabawk nula Immanuel Lalawmpuii chuan Lalrindiki Khiangte hla 'Min dem lul suh' tih hla a sa a, a che ṭha hle.

Tun ṭum Mizo Idol-a 'Leika­pui Style' hlawhtlinpui ber Jonathan Lalengzauva chuan a aw mil tak 'Zan tin mangṭha' tih a sa a, a thlawh fuh kher mai. Pangzawl tlangval zai hi ngaithlak a nuam.

Mizo Idol tura mi tam takin an hual Jerry Lalrinawma chuan English singer Ed Sheeran hla thul khung 'Perfect' a sa a, sap hla sak pawh a thiam hle.

Grand Finale chu...
July 25 aṭanga ṭan Mizo Idol Season 6 chu tun kar Zirtawpni zan hian a hmawr bawk a ni dawn ta.

Grand Finale zan hian intihsiak a awm dawn lo a, result puan a ni ang. Top 3 te chuan September 21 zan khan hla pahnih hmangin Mizo Idol nih inchhuhin an intihsiak a, chumi result chu puan a ni dawn.

Ticos Darhmingthanga ṭantuten Idol title hawn an duh dawn a, Champhai lamin H. Lalnunsiami chungah beiseina sang tak an nei thung. Chanmari mipuiin Jerry Lalrinawma an ṭawiawm ṭha leh dawn a, Mizo Idol thar lawm chakin an phu suau suau tawh bawk.

Grand Finale hi Zirtawpni zan hian College of Veterinary Sciences and Animal Husbandry, Auditorium, Selesih-ah puan a ni dawn.

Mizo Idol hian Rs. 1,50,000 bakah Scooter a dawng dawn a, pahnihna leh pathumna ten Rs. 80,000 leh Rs. 50,000 an dawng dawn bawk. Top 3 te hian LLOYD aṭangin thilpek hlu tak tak an dawng dawn cheu bawk a ni.