Gaga-i'n Cooper a fak bang thei lo!

Lady Gaga chuan film a chanpui American actor Bradley Cooper chu thawhpui nuam a tih thu a lo sawi tawh a, tunah pawh a aw mawi zia a sawi vul leh chuk tawh!

Gaga leh Cooper te hi 'A Star Is Born' film-ah an chang dun a, tlangzarh hma hauhin a lar vet vet tawh hle. He film hi Thawh­ṭanni khan Shrine Auditorium, Los Angeles-ah premier leh a ni a, mipui hmaah Gaga chuan a thawhpui hi a fak leh a ni.

American singer chuan, "Cooper nen hian film kan chang dun a, aw pawh kan thawh dun a ni. Ani nena kan zai dun thei hi ka lawm a, a aw pawh a mawi tak zet a ni," tiin a sawi. Gaga hian Cooper hi a fak bang thei lo a ni ber a, thahwpui zel a fuh thu pawh a sawi lang bawk.

October 5-a tlangzarh tur musical romantic drama film 'A Star Is Born' hi a trailer tihchhuah a lo ni tawh a, film festival lian hrang hrangah pawh premier a ni. He film-ah hian Bradley Cooper hi director a ni nghal bawk a, Lady Gaga bakah Andrew Dice Clay, Dave Chappelle leh Sam Elliott te pawh an inlan a ni.