Oscar dawng thei tur zingah Assamese film 'Village Rockstars'

Film Federation of India (FFI) chuan Assa­mese film lar 'Village Rockstar' chu film lama chawimawina sang, Oscar Award 2019 dawng thei tur zingah a chawpchhuak ta rup mai.

Oscar Award hi nakkum February thla khian a vawi 91 nan sem a ni leh dawn a, Best Foreign Film category-ah 'Village Rockstars' chi chawpchhuah a ni. Film Federation of India chuan he category-a chawpchhuah tur hian Bollywood film eng emaw zat a thlang chhuak a, chung zingah chuan Assamese film hi a ding chang ta a ni. Village Rockstar hian film lar tak tak - Manto, Padmaavat, Raazi, Hichki leh October te a khum a, dah hniam chi rual a ni lo.

Indian hmeichhe filmmaker lar Rima Das kutchhuak 'Village Rockstar' hi September 8, 2017 khan tlangzarh a ni a, award pawh a dawng hnem tawh hle. Nikuma Toronto International Film Festival-ah khan premier niin, National leh International film festival 70 chuangah chhuah a ni tawh bawk.

National Film Award-ah Best Feature Film atan thlan niin, a changtu kum 10 mi lek Bhanita Das chuan Best Child Artist award a la bawk. Hei bakah hian Best Location Sound Recordist leh Best Editing te a la bawk.

Film director Rima Das chuan, "India aiawh tura thlan a ni ta mai hi a ropui tak zet a, sawi thiam pawh a harsa zawk a ni. Hmarchhak kilkhawr tak aṭanga hetiang dinhmun thlen theih hi a ropui a, a phurawm tak zet a ni," tiin a sawi.

Indian film zingah Oscar Award dawng an la awm ngai lo a, Best Foreign Film category-ah hian film pali - Lagaan (2001), Salaam Bombay (1989) leh Mother India (1958) te chu chawpchhuah an lo ni tawh a ni.