Zaninah Mizo Idol 2018 a hriat dawn ta ; Grand Finale Show hmuhnawm tak en tur a awm dawn

July 25 aṭanga ṭan Mizo Idol Season 6 chu zanin hian a hmawr bawk a ni dawn ta a, Grand Finale Show hmuhnawm tak en tur a awm dawn. Show tawp lamah result puan a ni ang.

Aizawl veng lian pahnih - Chan­mari leh Chhinga Veng mi­puite chu Mizo Idol lawm turin an inpeih a, Champhai lam pawhin a veng nula hmuah dan tur an ruahman ngei bawk ang.

Jerry Lalrinawma, Ticos Darhmingliana leh H. Lalnunsiami te zinga tu emaw ber tan chuan zan chhin­chhiah tlak a ni reng tawh ang.

Grand Finale Show
Zan dar 8:00 aṭangin College of Veterinary Sciences and Animal Husbandry, Auditorium, Selesih-ah Grand Finale Show ṭan a ni ang a, Zonet Zawlbuk leh HD-ahte live-a pekchhuah a ni ang.

A hmunah mi 200 vel bawrin an en thei dawn a, sawm bik ni lem lo tan chuan TV lamah chân a fuh ang.

Zanin hian top 3 - Jerry Lalrinawma, H. Lalnunsiami leh Ticos Darhmingliana te an perform dawn a, top 11 te an inlan leh dawn bawk. Top 11 te hi Thawhlehni zana show neih ṭum khan an lo perform tawh a, zaninah pawh an hmel kan hmu leh thei dawn a ni.

Kolasib nula Grace Lalchhan­himi zai ngaithlak tur a awm dawn bawk. Grace-i hi kum 2014 khan Mizo Idol atan thlan a ni a, hmeichhe zinga Idol ni thei hmasa ber a ni nghe nghe.

Jerry The Boss a inpeih
Mizo Idol 2018 atana mi tam takin an hual chu Jerry Lalrin­awma a ni. Chanmari tlangval Jerry-a hian a theihna san zia a pholang hnem tawk tawh a, a lakah beiseina sang tak neih pawh hi thil mak a ni lo.

'Jerry The Boss' tia an sawi ṭhin Jerry-a chuan, "Result puan hi engtik lai pawhin a huphurawm a, mahse engpawh thleng se huaisen takin ka hmachhawn dawn a ni," tiin a inpeih thu a sawi.

Jerry-a chuan sawizawmin, "Ka contestant puite hi an thiam em em a, Mizo Idol chu tu pawh lo nise ka lawmpui em em vek. Mizo Idol hian lung a tileng dawn khawp mai," tiin, Vanglaini palai a hrilh.

Jerry-a hi an veng mipuiten an ṭawiawm ṭha thei hle a, zaninah pawh Chanmari kawnah Big Srceen-in an en leh dawn a ni. Jerry-a hi ropui takin an lo hmuak dawn a, an senso te hi an bialtu MLA chuan a tumsak dawn a ni.

Mami a hlauhthawng lo!
Champhai nula H. Lalnun­siami (Mami) chuan zanina result puan turah hlauhthawnna a neih loh thu a sawi. Mami chuan, "Mizo Idol nih tuma tel ka ni a, amah­erawhchu ka inbeisei ngam lo. Pathian thu thu a ni a, ka chungah eng pawh theng se lawm takin ka pawm ang," tiin a sawi.

Mami hian intihsiakah hian Pathian hla a sa ṭhin. Mizo Idol atan mi tam takin 'awm ber' an tih zinga mi a ni a, hei hi a thleng dik a nih pawhin a mak lo ang.

Champhai nula Mami hi tun hma lamin intihsiakah a la tel ngai lo a, Mizo Idol 2018 hi intihsiak a hmachhawn vawi khatna a ni. Chuti chungchuan top 3 a inhlang­kai nghal thei a, Mizo Idol ni thei dinhmunah a ding mek bawk.

Ticos a zam lo
Top 3 intihsiakah beisei angin a che ṭha tawk lo a, chuti chung chuan Ticos Darhmingliana a zam lo. Chhinga Veng tlangval Ticos-a chuan, "Ka lakah beiseina sang tak an nei a, an beisei anga ka che ṭha tawk lo erawh pawi ka ti hle a ni. Min ṭantute zawng zawng chungah lawmthu ka sawi a, min duhsakna hi a hlu tak zet a ni," a ti.

Ticos-a hian result puan chu a huphurh loh thu a sawi bawk a, result chu eng pawh nise a pawm tur thu a sawi.

Ticos-a hi kum naupang te ni mah se mimala lar ber tih ngam a ni. Ṭhalai lamah a tlana em em a, social media lamah pawh boruak nei lian ber zinga mi a ni. A zai 'cool' tak mai chu mipui ngainat niin, hei hi vawnnun zel pawh a tum. Ticos-a hian intihsiak zawh hnuah music video buaipui nghal a tum thu a sawi bawk a, a zai ngainatute tan chuan chanchin lawmawm tak a ni ngei ang.

Viewers Choice = Rs. 30,000
Mizo Idol Season 6-ah hian top 11 aṭang khan contestant te zai hi - Zonet YouTube Channel, Mizoram Idol Facebook Page leh Mizo Idol Instagram account-ahte upload ṭhin a ni a, entu pawh an tam ṭhin hle. Zanin hian top 3 zing aṭangin 'Viewers Choice' thlan a ni dawn a, lawmman ṭha tak a keng tel dawn.

Tunlai khawvelah social media hi lar tehna pakhat a tlin tawh avangin, YouTube, Facebook leh Instagram lama viewer ngah ber hi "Mipui Idol' ti pawhin a sawi theih awm e. Viewers Choice hian Rs. 30,000 a kengtel dawn a ni.

Lawmman lam hi...
Mizo Idol Season 6-ah hian kum dang zawng aiin lawmman a ṭha dawn a, Winner hian pawisa fai Rs. 1,50,000 bakah, Scooter a dawng dawn.

Pahnihna dawn tur hi Rs. 80,000 leh Lloyd TV 33 inches a ni dawn a, pathumna hnenah Rs. 50,000 bakah Lloyd Washing Machine hlan a ni bawk ang.

Top 6-a inhlangkai te khan Rs. 15,000 ṭheuh an dawng a, top 11 te pawh Rs. 10,000 ṭheuh hlan an ni bawk.