DJ-i musical feature film 'Ni Thar Duhawm' October 12 zanah Vanapa Hall-ah tlangzarh a ni dawn

October 12 khian DJ Lalven­himi musical feature film 'Ni Thar Duhawm' tih chu Vanapa Hall-ah tlangzarh a ni dawn ta. Hemi rual hian hla thar ?hiau 11 a awmna DJ-i audio album chu tlangzarh a ni dawn bawk.

He musical feature film hi - lam, zai leh hmuhnawm chitin reng awmna, ṭhalaite duh chi tur tak a ni. He film hi a puitlin theih nan hian zaithiam DJ Lalvenhimi hian kum thum kalta vel a aṭang khan a lo buaipui tawh a, tunah chuan engkim peihfel a ni tawh. DJ-i hian zai mai bakah film chan pawh a lo thiam hle a, en chakawm tawh tak a ni. A zai eng emaw zat ngaihthlak leh hmuh tur a awm dawn bawk a ni.

Engtin zel...?
June thla aṭang khan Aizawl khawpui chhung leh pawn hmun hrang hrangah shooting neih a ni a, tunah chuan tlangzarh turin peih fel a ni ta. Film lama hnuhma nei ṭha tak - Adama leh Hruaia Sailo te kan hmu leh dawn a, en tichakawm zualtu zinga mi an ni.

Lam thiam tak tak hmuh tur an awm dawn bawk a, Alan Rinawma leh a pawlte 'Mizo Dance Camp' an intheh ṭhil vel dawn a ni.

Video hi Dinagrafix kut­chhuak niin, Mizo ten kan la neih zen zen loh he musical feature film hi uluk taka buatsaih a ni.

True story?
'Ni Thar Duhawm' hi thil a taka thleng 'True Story' behchhana siam niin an sawi a, en tichakawm zualtu a ni. Thil a tak ngeia thleng behchhana siam film hit tak tak a lo awm tawhṭhin a, Mizo film-ah ngei pawh hmuh tur a awm zauh zauh. Chutiang zingah chuan 'Ni Thar Duhawm' hi a tel a nih chuan en a mah hla leh zual dawn hle a ni.

Dj-i a thawkrim
DJ-i hian music video siam lovin, hla leh video inkawp awmna musical film hi a buatsaih a, a hau tak hle ang tih a rinawm. 'Ni Thar Duhawm'-ah hian DJ-i hi a changtunu a ni nghal a, hla pakua vel a awm dawn bawk a ni.

Hetiang meuh puitlin tur chuan hun leh sum pawh a hautak hle ang tih a rinawm a, DJ-i bakah hian ṭhalai hmel thar eng emaw zat hmuh tur a awm dawn a ni.

DJ Lalvenhimi channa 'Ni Thar Duhawm' hi pawl leh mimal tan sum tuak nan a hman theih dawn a, booking tiduh tan - 87946 45115 ah biak theih a ni.