MPF-in music video pathum tlangzarh

Mizoramah inthlanna dik, felfai, zalen leh thianghlim a awm theihna atana hma latu Mizoram People Forum (MPF) in an hmalakna tichaktu atana music video pathum an siam chu nimin khan Aizawl Press Club-ah tlangzarh a ni. Heng music video te hi MPF vice president Rev. B. Sangthanga chuan a tlangzarh a ni.

MPF General Secretary Rev.Dr. R. Lalbiakmawia chuan music video chungchang sawiin, "MPF hian tun ṭuma music video pathum kan tihchhuah hma hian Pathian thu anga ram leh hnam siamṭhatna lam hawi music video pali kan lo nei tawh a ni. Chu'ng zingah chuan - 'I din thar leh ang u' tih te, 'Nangni roreltute u' tih te, 'Kan ram a tidam leh ang' tihte pawh a tel a ni," a ti.

Nimina tlangzarh tak 'Ram chu Lalpa ta a ni' tih hi Upa Sanglianthanga, Tlangnuam phuah niin, zaithiam hrang hrang - Upa Sanglianthanga, Cindy Lalthanpuii (Tlangnuam), Hlimhlimi (Armed Veng), Magry Lalremruati (Mission Veng), Golden Lalmuanpuii (Republic Veng) leh TPa (Chanmari) ten an sa a ni.

Rev. J Lalbiaknia hla 'Zoram nuam i siam ang u' tih hmangin MPF chuan music video an siam bawk a; hetah hian zaithiam lar tak tak pali - Arini (Leitan), David Vanlalpeka (Mission Veng), Lalruatdiki (Mission Veng) leh Remruata (Laipuitlang)-te an zai. Video hi Vana Videography, Mission Veng kutchhuak a ni.

Music video dang pakhat, Lal­ram­nghinglova (L) phuah 'Zoram thlaphang' tih hla hmanga music video siam pawh tlangzarh nghal a ni a, mahse, video-ah siamṭhat ngai a awm avangin la tihchhuah a ni rih lo. He hla hi Lunglei lam zaithiam Lalenkawli Pautu-in mawi takin a sa a; video-ah chuan kumin March thla vela Bairabi Zophai lama buaina te, MPF leh political party ten thawhhona thuthlung an ziak laite tihlan tel a ni.

Music video pathum bakah hian MPF chuan inthlanna dik, felfai leh thianghlim neih a nih theihna atana MPF hruaitu hrang hrangin mipui an sawmna video clip tawi pawh siam a ni a, nimin vek khan tlangzarh nghal a ni.