KṬP General Conference theme song zaninah tlangzarh dawn

KṬP General Conference theme song 'Tunlai thil awmzia' chu zaninah hian tlangzarh a ni dawn.

'Tunlai thil awmzia' hi Choir Cabin, Synod Conference Centre-ah zanin dar 7:30-ah hian Rev. Vanlalmuanpuia Khiangte, Leader, CKṬP chuan Pathian hnena hlanna a nei dawn a, CKṬP YouTube channel lamah dah nghal a ni ang.

He hla hi Malsawmtluanga Sailo, Falkland phuah niin music chu Drop Doubt kut chhuak a ni a, SVP chuan video a siam sak thung. Electric Veng Kohhran Hall-ah shooting an nei thung. A hla tawp lamah descant part solo mawi tak a awm a, chu part latu chu Benjamin Pazawna, Tenor a ni.

'Tunlai thil awmzia' hi KṬP Conference theme song pasarihna niin, KṬP General Conference Vawi 59-na hi Kolasib-ah ni May 5-8, 2022 a neih turin ruahmanna an siam a ni.