Swat-Kats Reboot! T-Bone leh Razor kan hmu leh dawn

90's animated cartoon series lar tak Swat-Kats kha 80's leh 90's kids chuan an la hre ṭheuhin a rinawm. Tunah hian reboot turin hma an la mek a, an hmalakna hi a hlawhtling a nih chuan fighter pilot pahnih T-Bone leh Razor-te Megakat City-a an chevel kan hmu leh thuai dawn niin a lang.

Toonz Media Group chuan original creator Christian Tremblay leh Yvon Tremblay-te chu producer ni turin an thawhpui a, 'Swat-Kats: Revolution' tiin a series hming pawh an vuah tawh a ni.

Original show 'Swat Kats: The Radical Squadron' tih niin kum 1993 khan season hnih tihchhuah a ni a, tuna an siam thar leh hi Toonz chuan ram hrang hranga chhuah turin hma an la a, character dangte pawh siam belh an tum bawk.

Toonz chuan Nilaini khan hemi chungchang hi tarlangin 'Swat-Kats: Revolution' tih a nih dawn thu leh Megacat City-ah bawk T-Bone leh Razor-te chu an chet tlat dawn tih an tarlang. Naupang kum 5-11-te chu an target viewer an nih dawn thu an sawi a ni.

T-Bone leh Razor-te chuan series hmasaa misualte bakah misual character thar an hmachhawn dawn tih an sawi a, an ralthuamte pawh a changkang tawh zawk dawn tih an sawi bawk.