Comedy film-ah Ed Sheeran

British singer Ed Sheeran chu comedy movie 'Sumotherhood'-ah a chang dawn.

Kum 30 mi 'Shivers' hitmaker inlanna tur film hi London-ah an chang ṭan thuai dawn a, Danny Sapani, Jennifer Saunders, Peter Serafinowicz, Leomie Anderson, London Hughes, Kevin Bishop, Jaime Winstone, Vas Blackwood leh Kobna Holdbrook-Smith-te pawh an inlan dawn a ni.

He film thar turah hian Adam Deacon, Jazzie Zonzolo, Richie Campbell leh comedian Eddie Kadi-te chu an chang dawn tih a hmain tihchian a lo ni tawh bawk . Heng tarlante bakah hian lemchan thiam, comedian leh rimawi khawvela milar eng emaw zat cameo hmuh tur a awm dawn bawk niin an sawi.

'Sumotherhood' hi February emaw March thla velah emaw hi chuan Hackney leh East London velah chang ṭan mai an tum a, Adam Deacon hian a direct nghal dawn bawk a ni. Kum 2011 daih tawha tihchhuah 'Anuvahood' chhunzawmna tur niin tlangzarh hun tura an ruahmanna siam erawh an la puangzar lo.

Edward Christopher Sheeran hi a hma pawhin lemchan lamah a inlan zeuh zeuh tawh a, chung zingah chuan 'Bridget Jones's Baby', 'Game of Thrones', 'Yesterday' leh tunhnaia Netflix hit movie 'Red Notice'-te pawh kha a tel a ni.