2022 Billboard ‘Woman of the Year’ Olivia Rodrigo

Billboard 2022 'Woman of the Year' chu puan chhuah a ni ta a, chu chu tudang ni loin American tleirawl Olivia Rodrigo a ni. March thlaa Billboard Women in Music Awards semnaa he chawimawina hi hlan a ni ang.

Zirtawpni liam ta khan Billboard 2022 'Woman of the Year' hi an puangzar a, March 2 hian YouTube Theater, Hollywood Park, Inglewood, California-ah he chawimawina hlanna ceremony hi an buatsaih dawn a ni. Billboard Editorial Director Hannah Karp chuan, "Superstardom-a Olivia a rawn invawrh chhuah dan hi pop music legend-te tihdan a ni. Storyteller leh songwriter a nihna anga talent a neihte hian kum eng emaw zat chhunga artist thar lawmawm ber leh ṭha ber zinga miah a rawn siam a ni," tia sawiin Olivia Rodrigo chu a fak hle.

Nikum kumtirah khan Olivia Rodrigo hian a debut single 'Drivers' license hmangin rimawi khawvel a rawn rûn a, record tam tak siamin a studio album hmasa ber 'SOUR' chu nikumah vek khan tlangzarh bawkin a hit nghal rem rem hle a, Rolling Stone magazine phei chuan he album hi 'No. 1 album of 2021' tiin a sawi hial.

Kumin Billboard Women in Music Awards chu 2009 Woman of the Year Ciara-i'n a host dawn a ni. Award dawngtu tur dangte pawh puanzar lo ni tawhin chung chawimawina dawng turte chu an inlan vek dawn nghe nghe.

Billboard WIM awards 2022-a award dawg turte chu:-
Gabby Barrett - Rising Star Award
Phoebe Bridgers - Trailblazer Award
Doja Cat - Powerhouse Award
Golnar Khosrowshahi - Executive of the Year Award
(Founder & CEO of Reservoir Media)
Karol G - Rule Breaker Award
Bonnie Raitt - Icon Award
Saweetie - Game Changer Award
Summer Walker - Chartbreaker Award