Sonakshi Sinha-i'n Deepika a fak Sorkar lamin Deepika an hrêk ve thung

Deepika Padukone-i'n Jawa­harlal Nehru University campus a tlawh boruak chuan ziaawm lam a pan hleithei lo a, Bollywood lamah pawh thlawptu an awm belh zel.

Hetihlai hian sorkar laipui chuan Skill India tihlarna tura Deepika inlanna video chu an paihsak. Sonakshi Sinha chuan a twitter-ah Deepika a tlawp thu sawiin, JNU-a pawikhawihna thleng duh lohnaa a inlan chu a fak hle. 

"Eng political party pawh thlawp mah la, tharum thawhna i thlawp a mi? Zirlai leh zirtirtute thisen chhuak khan a sawi che lo che u em ni? Bang phenah kan ṭhu reng thei tawh lo ang. Deepika Padukone leh ṭawngchhuak zawng zawngte ka fak hle. Tun hi ngawih hun a ni lo," tiin tweet a siam.

Student of the Year star Varun Dhawan pawhin JNU-a pawikhawihna thleng chu a dem thu sawiin, Madhya Pradesh-a thuthar thehdarhtute'n an kawmnaah, "Hemi chungchang­ah hi chuan ngaihdan nei loin kan awm thei lo ang. Hetiang inbeihna hi chu in dem tur a ni. Hmaikawr vuahte zirna inah an lut a nih chuan thil hlauhawm leh lungchhiat thlak a ni a, chutiang thil chu a thleng a ni," tiin a sawi. Police-te a rintawk thu sawi bawkin, an chhuichian hnuah buaina chu an chinfel a beisei tih a sawi bawk.  

Anurag Kashyap, Swara Bhasker, Zeeshan Ayyub leh Richa Chadha-te pawhin Citizenship Amendment Act leh CAA an dodalna thu leh sorkar an dem thu an auchhuahpui laiin Varun erawh hi chuan hemi chungchangah tak hi chuan ngawih a chuh rih thung. A film tilara a zin lai a nih avangin thil a hrechiang lo a, chuvang chuan engmah a sawichhuak duh rih lo niin a sawi. JNU-a tharum thawhna thleng chungchang hian ngaihven a hlawh chho zel dawn niin a lang a, misualte chet dan demtu zingah hian Kartik Aaryan pawh a tel a ni.

Ministry of Skill Development hnuaia Skill India tana Deepika-i'n promotional video a siam chu mak tak maiin thuneitu lamin an paihsak daih!

JNU zirlaite kianga a va kal hnu ni hnihnaah Deepika video hi an paih a, sorkar offical pakhat a hming thup chuan, "Skill India tihlarna tura promotional video pakhat, Deepika Padukone telna chu tihchhuah tura tih a nih hnu, offce lamah pawh an endik vek tawh hnuah paih a ni," tiin a sawi; nimahsela ministry lam chuan a video chu an la 'zir chiang' tiin an sawi ve thung - he thu hi Indian media-te chuan an chai zui nasa hle.

Deepika hian JNU zirlaite kiangah hian eng thu mah a va sawi lo a, JNU Students Union president Aishe Ghosh leh zrlai dangte a va hmu a, rei lo te awmin a kal leh ta mai a; nimahsela JNU zirlaite kianga Deepika a va kal hi sorkar lai BJP leh an thurualpui lam chuan an helh a ni.