'Scream' sequel an buaipui leh der tawh

Paramount Pictures leh Spyglass Media-te chuan 'Scream' chhunzawmna tur an buaipui ṭan leh nghal der tawh.

Tuna an buaipui ṭan mek hi Scream film series parukna tur a ni tawh dawn a, a film title tur erawh an la sawi ri lo thung.

Matt Bettinelli-Olpin leh Tyler Gillett-te chuan an direct leh dawn a, James Vanderbilt (Murder Mystery, Zodiac) leh Guy Busick (Ready or Not, Castle Rock) te chu screenplay an buaipui dun dawn a ni. Tun nipui chhung hian he film hi chan ṭan leh mai an tum a, 'Scream' tihphung pangngaiin a plot detail erawh an la puangzar lo. Mahse Ghostface hmaikawr vuahin Woodsboro, California-a chengte a tibuai leh hle dawn tih erawh 'Scream' fan-te chuan an hre chiang sa ngei ang.

Thla hmasa lawka tlangzarh Scream film pangana 'Scream' (1996-a tlangzarh 'Scream' ni lo zawk) kha a hit hle a, $mtd 26 vel senga an siam niin $maktaduai 100 lai sum a hmu chhuak. Marley Shelton, Courteney Cox, David Arquette leh Neve Campbell-te chu an rawn inlan leh vek bawk a ni.