Hontrade International Ṭhazual Lengzem ; Ṭum thum No.1 hauh thei - Zorinzuali Khiangte Manuna & Feli Fanai 'I leng dun zel ang' inlar nghal

Ṭhazual Lengzem chart-ah Zorinzuali Khiangte nek chuak thei an la awm lo a, a zawnin ṭum zet No.1 a hauh ta. Bibi Hmar hla phuah 'Min hnawl si maw' tih hla hmangin dinhmun sang ber hi a luah a ni.

Hetih lai hian hmanni lawka music video tichhuak dun - Manuna leh Feli Fanai te chu top 10-ah an lang nghal a, 'I leng dun zel ang' tih hla hmangin pasarihna an hauh.

Vul lai a rei...
Tunlai lengzem singer zingah chuan Zorinzuali Khiangte hi boruak nei lian ber zinga mi niin, 'top artist' kan tih zinga mi a ni. Hun eng emaw chen aṭang tawh khan Ṭhazual chart-ah No.1 a lo hauh tawh ṭhin a, tun thlengin he dinhmun hi a la luah thei a ni.

July thla-a a tichhuah 'Min hnawl si maw' tih hi tunlai lengzem hla thlan hlawh ber a ni a, a zawna ṭum thum zet dinhmun sang ber luh thei anih avangin dah hniam chi rual a ni lo.

Zorinzuali Khiangte hian a music video lo siam tawh te chu a larpui viau zel a, Ṭhazual chart-ah dinhmun sang an thleng phak ziah bawk. 'Min hnawl si maw' tih hla hi Bibi Hmar phuah niin, Mizo rilrem zawng tak a ni.

Hmeichhia an langsar
Tun ṭum chart-ah hian hmeichhia an langsar hle a, mipa hming hmuh tur a awm meuh lo. Pahnihna hauhtu hi Zemabawk nula Josephine Lalawmpuii a ni a, Lunglei lam star Jenny Jathang chu pathumna a ni. Josephine-i hian 'Duhaisam Di' tih hla hmang­in chart-ah dinhmun sang tak a thleng a, a hmel pawh kan hmu zing malh malh hle.

'Mai a lum e' tih hla hmangin Rachel Lalnunkimi chu palinaah a inhlangkai a, Marina V. Varte chu top 5-ah a lang ve leh bawk. Venghlui nula Rachel-i hian tun hnai khan 'Mai a lum e' hi a tichhuak a, a larpui leh mek a ni.

Kawnpui nula Aziri chu pa­ruk­na-ah a awm a, Zauvi, Noel Hrahsel leh KR Robert te chu top 10-ah hian an lang bawk.