October 26-ah Gwen Stefani Krismas album

Krismas a lo hnai leh ta a, khawthlang zaithiam te pawhin he lam hi an hawi leh fur tawh. Chung zingah chuan American rock band lar 'No Doubt' vocalist, Gwen Stefani pawh a bang bik lo a, October 26 hian Krismas album a tichhuak dawn.

Hemi chungchang hi tun hnai kha Twitter kaltlangin a tarlang a, album-ah hian hla hlui leh thar a inpawlh nuk dawn a nih hmel. American sin­ger Stefani hian nikum October thla khan Kris­mas studio album 'You Make it Feel Like Christ­mas' tih chu a tichhuak a, hla thar dang paruk belin a tichhuak leh dawn ta a ni.

He album-ah hian origi­nal track 12 a awm dawn a, chung zingah chuan - Santa Claus Is Co­ming to Town, Winter Wonderland leh Feliz Navidad te pawh a tel leh dawn a ni.

Kum 48 mi, American country singer lar Blake Shelton-a nupui Gwen Stefani hian Krsimas hla a lo sa fo tawh ṭhin a, nikum pawh khan Macy's Thanksgiving Day Parade-ah 'White Christ­mas' a sa a ni. Hei bakah hian 'The Tonight Show' ah Jimmy Fallon nen hun an hman dun ṭumin 'Last Christmas' a sa bawk.

A pasal Blake Shelton nen album an tichhuah 'You Make It Feel Like Christ­mas' pawh hi Billboard 200 chart-ah No. 16 a theng phak a ni. Hetih lai hian a album thar tur hi a title a la tangzarh lo thung.