Box Office Top 10 ; Comedy film 'Night School' in sum lalut hnem ber

North America lamah chuan comedy film chhuak thar 'Night School' chu tun laia film en hlawh ber a ni mek a, Box Office-ah No.1 a hauh.

He comedy film hi Sep­tember 28 khan US-ah tlangzarh ani a, tlangzarh kar hian $mtd 28.0 a lalut a ni. American fiam­thu thiam Kevin Hart leh Tiffany Haddish te channa 'Night School' hi tun hnaia film chhuak zingah chuan ngaihven hlawh ber pawl a ni a, a sum lakluh erawh a turu teh chiam lo.

Sum lalut tam pahnihna chu tun hnaia tlangzarh tho 'Smallfoot' niin, a sum lakluh zat chu $mtd 23 a ni. He fantasy/musical film hi 'A Simple Favor' chuan a dawt a, a sum thawhchhuah zat chu $mtd 6.60 a ni

Kar hmasa lama No.1 hauh thei The House With A Clock In Its Walls chu pathumna-ah a tla thla a, a sum lakluh a tlem hret hret. Australian actress Cate Blanchett leh kum 12 mi Owen Vaccaro channa hi September 20 khan tlangzarh a ni a, kar liam ta khan $mtd 26.8 a lalutin dinhmun sang ber a luah a ni.

A Simple Favor leh The Nun te chu top 5-ah an lang a, an sum lakluh zat chu $mtd 6.60 leh $mtd 5.43 te a ni. Crazy Rich Asians chu sum lalut tam zingah a lang leh a, a sum lakluh erawh $mtd 4.15 chauh a ni.

Hetih lai hian The Predator pawhin beisei a phak lo zui zel a, kar liamta chhunga a sum lakuh chu $mtd 3.70 a ni. American film star Olivia Munn leh Keegan-Michael Key te channa The Predator hi UK Box Office-ah chuan a hit hle thung a, No.1 a lo hauh zak zak tawh a ni.