American Music Award 2018 Taylor Swift-i'n a khuh hawng dawn

Kum tina sem ṭhin American Music Award chu October 10 hian sem a ni leh dawn ta a, thawm nei lian ber chu Taylor Swift a ni. American singer hian award ceremony hi a khuh hawng dawn a, kum thum hnua a perform lehna hmasa ber tur a ni bawk.

Taylor Swift hian Thawhlehni khan ABC Good Morning America-ah a perform tur thu hi a puang a, fan te an phur hle. Dick Clark Productions chuan he thu hi an nemnghet tawh bawk a, 'Delicated' singer hian 'I Did Something Bad' a perform dawn niin an tarlang.

Tute nge perform dawn?
American Music Award hian ngaihlu a hlawh ṭhin hle a, award ceremony-a perform pha chin pawh top artsist te an ni ṭhin. Kuminah hian Taylor Swift chuan opening a chang dawn a, thik chi rual a ni. Swift hian American Music Award hi 19 zet a lo dawng tawh a ni.

Taylor Swift bakah hian - Benny Blanco, Halsey leh Khalid te chu an perform dawn a, Mariah Carey inlan tur thu puan chian a ni tawh bawk. Heng chauh hi an la ni lo a, Ciara, Missy Elliott, Post Malone featuring Ty Dolla $ign, Carrie Underwood, Cardi B leh english singer Dua Lipa te chuan stage an luah lum dawn a ni.

Award dawng thei tur te...
Award dawng thei tur zingah Taylor Swift bawk a langsar a, award ngaihlut hlawh 'Artist of The Year' dawg thei turin a dinhmun a ṭha hle. Chutih rual chuan a elpui tur te hi Canadian rapper Drake, English singer Ed Sheeran leh American rapper Post Malonete an ni nawk a, a awlsam dawn lo.

Rap huangah chuan Drake leh Cardi B te an langsar a, cateogry pariat zetah an hming a lang a ni. Sheeran leh Malone te chu award paruk dawng thei dinhmunah an ding mek a, Camila Cabello chu category panga-ah a hming a lang ve bawk.

American Music Award hi Microsoft Theater-ah sem a ni dawn a, award dawng tur te hi fan ten vote hmangin an tlang ṭhin a ni. Tracee Ellis Ross chuan show hi a host dawn a, 'Queen of Soul' Aretha Franklin sunna hun hman a ni ang.