Social media khelmualah CR7-in record a siam leh ta

Mihring damlai zinga Instagram-a follower mtd 400 nei tling thei hmasa ber a ni

Manchester United star Cristiano Ronaldo chuan field chhungah leh social media lamah a khat tawkin record a break reng a, tunah pawh record thar a siam leh ta.

Inrinni liam ta maia kum 37 piancham lawmtu C. Ronaldo chuan Instagram lamah follower maktaduai 400 a nei tling ta a, mihring zingah hetiang zat follower nei hi an la awm ngai loa, Ronaldo hi a hmasa ber a ni.

September 2021 khan Portugal captain hian follower mtd 237 neiin khawvela mihring account follower ngah ber record a lo siam tawh a, chumi hnuah chuan nasa takin a follower an pung a, tunah phei chuan mtd 400 chuangin an follow tawh hem mai a ni.

Nimin thleng khan post 3,242 a siam tawh a, a post apiang chu chawhrualin mi mtd 10 velin an 'like' ziah ang a ni. Amah hian user 500 vel a follow ve bawk.

Kylie Jenner chu follower ngah ber dawttu niin follower mtd. 309 a nei a, Lionel Messi chu pathumna niin follower mtd. 306 vel a nei ve thung.