October 12-14 chhunga neih tur MTV India music summit-ah Mizo Cardinal Choir an zai dawn
India rama music show ropui ber pawl MTV India music summit chu October 12-14 chhung hian Fairmont, Jaipur-ah neih a ni dawn a, he hunah hian Mizo Cardinal Choir te chu an zai dawn.
MTV India music summit-ah hian hla pasarih vel an sa dawn a, India rama music channel lian hrang hrangah pek chhuah a ni ang. Show hian darkar 36 vel zet a awh dawn a, Mizo Cardinal Choir te pawh hi an inbuatsaih nasa hle a ni.
MTV India music summit sponsor tute hi, Britanica, USA GoUSA.in, NESCAFE, Volkswagen, LIC (Life Insurance Corporation of India) leh Rajasthan Tourism te an ni nawk a, hei hian he music summit nep loh zia a tarlang. An partner te pawh Pepsi, bookmyshow, Air India, Sangeet Natak Akademi, Network18, MTV leh Times of India te an ni.
Sulhnu ṭha
Mizo Cardinal Choir hi kum 2012 khan din a ni a, tunah hian member 11 an awm mek. India ram hmun hrang hrang leh khawvel ram dangahte pawh zaiin an chhuak fo a ni.
Rimawi khawvela Mizote phochhuaktu zingah telin, hnam zia pholanna kawngah pawh an thawh hlawk hle a ni. Kum 2015 khan Bollywood Republic nen thawk hovin A.R. Rahman hla 'Rubaroo' chu recording leh music video an lo siam tawh a ni. 'Rubaroo' hi Bollywood movie lar tak 'Rangde Basanti' theme song atan hman niin, Vh1 leh MTV ahte pawh tihchuah a lo ni tawh a ni. Mizo Cardinal Choir te hi kum 2017 khan Asia Pacific Choir Games-ah an lo tel tawh a, 'Vocal Ensemble Category-ah pakhatna an ni a, Champion Trophy an hlawh chhuak bawk. Hei hi India-in he inelna-a a thlen san ber ṭum niin, Mizoram mai bakah India tihmingṭhatu an ni.
Kumin July tha khan khawvela zaipawl inelna ropui ber, World Choir Game, South Africa-a neihah khan telin, Silver medal an la bawk a ni.
Hei bakah hian Musica Mundi-in zaipawl ṭha ranking a tarlan-ah Mizo Cardinal Choir hian No.1 an lo hauh tawh a, India rama zaipawl ṭha ber dinhmun an luah tehi hi an chhuanawm tak zet a ni.