Nobel Peace Prize dawng tur anti-rape activist Nadia Murad & Denis Mukwege

Khawvela chawimawina ngaih ropui ber Nobel Peace Prize chu, anti-rape activist pahnih - Denis Mukwege leh Nadia Murad te hnenah hlan a ni dawn.

Denis Mukwege leh Nadia Murad te hi indo avanga hmeichhia ten pawng­sual an tawh ṭhin doletna kawnga hma latute an ni. Nobel committee chair Berit Reiss-Andersen chuan, "Denis leh Nadia te hian he chawimawina hi an phu a, an hnathawh hi a ropui tak zet a ni," tiin a sawi.

Tunge Nadia Murad?
Human rights activist Nadia Murad hi Iraq mi niin, kum 25 mi chauh a la ni. A hming tak chu Nadia Murad Basee Taha a ni a, Yazidi Kurdish human rights activist lar tak a ni.

Nadia hi mihring dikna chanvo humhalh kawngah a thawhhlawk hle a, hriat pawh a hlawh hle a ni. Nadia Murad hi Islamic State (IS) ten Yazidi hmeichhie ten an pawngsual ṭhin duh lo a, dodaltu langsar tak a ni. IS te hian Nadia hi an man a, kum thum dawn an hreng zui a ni.

November 2014 khan IS kut aṭang hian a chhuak a, indona avanga hmeichhe pawngsual tawkte tan nasa takin a bei a, mihring hmanga sumdawnna dona kawngah a thawh hlawk hle bawk.

A mihring puite tana a hnathawh hian hriat a hlawh a, kum 2016 khan Dignity of Survivors of Human Traf­ficking of the United Nations (UNODC) Goodwill Ambas­sador atan ruat a ni.

Gynecologist Dr. Mukwege
Kum 63 mi Dr. Denis Mu­kengere Mukwege hi kum 1955 khan Democratic Repub­­lic of Congo-ah a piang a, pawngsual tawk hmeichhia enkawl kawnga mi thiam bik a ni. Mukwege hian hetiang tawk hi mi 30,000 vel zet chu a enkawl tawh a ni.

A hnathawh hian hriat a hlawh hle a, khawvela chawimawina ngaihlut ber Nobel Peace Prize a dawn phah dawn ta a ni.

Denis Mukengere hi Congolese gynecologis tniin, Panzi Hospital, Bukavu-ah a thawk. Second Congo War lai vel ṭang tawh khan a hnathawh hian hriat a hlawh ṭan a, ni khatah darkar 18 te hna a thawk ṭhin a ni.

September 2012 khan an rama pawngsualna thleng chung­changah United Nations-ah thu a sawi a, mi­hring dikna chanvo humhalh kawngah a thawh hlawk hle a ni.

Nobel Peace Prize dawng tur hi nimin khan Oslo-ah puan a ni a, he chawimawina dawng thei tur hian mi 331 chhawpchhuah an ni. US president Donald Trump leh North Korea hotu Kim Jong-un te chu he chawimawina dawng thei tura hming langsar an ni a, a tawpah erawh Denis leh Nadia te hi thlan an ni ta a ni.