'Jackass Forever' a hit 'Moonfall'-in beisei pha lo

Box Office-ah 'Spider-Man: No Way Home' rorelna tihtawp a ni a, Spider-Man chungah hian film thar pahnih 'Jackass Forever' leh 'Moonfall' an ding.

Jackass chu Jackass nge nge a ni
Reality slapstick comedy film 'Jackass Forever' chu kar tawp liam ta khan North America Box Office-a sum lalut tam ber a ni a, theatre 3,604 aṭangin $23,154,388 lai sum a lalut.

'Jackass' film series hi chu mi tam tak hi chuan kan hriat tawh ṭhin a rinawm. 'Jackass Forever' hi a main line series-ah chuan palina a ni a, a spin-off chhiar tel erawh chuan pangana a ni thung. Kum 2010-a tihchhuah 'Jackass 3D' chhunzawmna kha niin kum eng emaw chen 'Jackass' series tihchhuah a nih tawh loh hnuah $maktaduai 10 vel sengin an rawn siam thar leh a, America mipuite chuan an lo la lawm hle tih a hriat.

'Jackass' film series hmasa lam kan hmuh tawh ṭhin Johnny Knoxville, Steve-O, Chris Pontius, Dave England, Wee Man, Danger Ehren, leh Preston Lacy-te chu 'Jackass Forever'-ah hian an rawn inlan leh ṭhap a, film review-tu lam pawhin an fak hle nghe nghe.

Rotten Tomatoes lamah chuan critics 104-in an review aṭangin ratings 7.40/10 lai a hmu phak a ni.

Beisei ang sum lalut lo 'Moonfall'
Science fiction film thar, film star lar tak tak channa, $maktaduai 138-146 vel zet senga an siam 'Moonfall' chuan kar tawp liam ta chhung khan theatre 3,446 aṭangin $9,868,997 chiah sum a lalut a, chart-ah pahnihna a ni. 'Jackass Forever' nen an sum lakluh a inthlau hle.

Halle Berry, Patrick Wilson, John Bradley, Michael Peña, Charlie Plummer, Kelly Yu, leh Donald Sutherland-te channa film hi critics lamin an fak lo angreng hle a, Rotten Tomatos lamah review 144 aṭangin ratings 5.3/10 chiah a hmu. Sci-fi film ngainatute tan erawh a hmuhnawm viau tho ang.

Film che ṭha zual dangte chu...
'Spider-Man: No Way Home' chu pathumna a la ni pha tho a, theatre 3,600 aṭangin $9,507,325 lai sum a la hmu chhuak pha tho. He film hian $1,775,858,932 lai ram hrang hrang aṭangin a hmu chhuak tawh.

'Scream' chu palina a ni a, Sing 2 chu pangana a ni bawk.

Film thar dang
Box Office Mojo chart lamah film thar a awm ve nual. 'The Wolf and the Lion' chu 11-na a ni a, 'The Worst Person in the World' (20), 'Poly Styrene: I Am a Cliché' (34), 'Breaking Bread' (35) leh 'Lingui' (36) te chu film thar a ni bawk.

Box Office top 10:-
1 Jackass Forever $23,154,388
2 Moonfall $9,868,997
3 Spider-Man: No Way Home $9,507,325
4 Scream $4,752,852
5 Sing 2 $4,214,650
6 The King's Man $1,227,304
7 Redeeming Love $1,011,630
8 American Underdog $780,697
9 The 355 $698,275
10 Licorice Pizza $644,69