Hontrade International Ṭhazual Fakna ; Dinhmun sang berah Amtea

Tunlai gospel singer zingah Amtea Chhakchhuak tluka vang­lai chen an awm chuang awm lo e. August thla maia a tihchhuah 'Engkim ka hlan e' tih chu tunlai fakna hla thlan hlawh ber niin, Ṭha­zual Fakna chart-ah No1. a hauh.

Amtea hian dinhmun sang ber luah turin hun a mamawh rei lo hle. 'Engkim ka hlan e' tih hla hi Rev. C. Lalrinliana lehlin niin, Amtea hian thiam takin a sa chhuak a ni. He hla hi kumina a music video pahnihna niin, Jenn Ralte chuan a pui a ni.

Amtea chuan, "A hma chuan a production-ah te, a mu­sic nalh leh nalh lohah te ka buai ṭhin. Performance thlengin ka ngaipawimawh ṭhin a, a pawimawh ber Pa­thian ka lo dah pawimawh tawk lo ṭhin. Tun ṭum chu a pawimawh berah let leh turin Lalpa'n min ti a, thil dang dahṭha vekin, a simple thei ang berin ka ti chhuak a ni," tiin, a music video chungchang hi a lo sawi tawh a ni.

Tenu-i a inlar
Saitual nula P.C Vanlal­hriati (Tenu-i) chuan a vawi khat nan Ṭhazual Fakna chart-ah No.2 a hauh a, a thlen san ber ṭum a tawk mek. Tenu-i hi hun eng emaw chen chu 'Ka hria a sin' tih hla hmang hian top chart-ah a lang tawh a, hma a sawn hak hle. Dinhmun sang ber luah turin a dinhmun a ṭha hle a ni.

Mizo Idol star Grace Lal­chhan­himi chu 'Rinin ka thlir ṭhin' tih hla hmangin top 3-ah a inhlang kai a, Felfeli Ralte chu palina a ni. Stacy V.L. Muanpuii pawh a hla thar 'Kan hneh zel dawn' tih hmangin top 5-ah a inhlang kai bawk.

Top chart-a No.1 pawh lo hauh fo tawhtu Judith Lalremruati chu 'Kan fam­kimna' tih hla hmangin paruk­na-ah a awm a, a hla duhtu an la tam tih a lang. Armed Veng South nula Hlimhlimi chu pasarihna-ah a awm a, Jennie Lalruatfeli chuan adawt.

Jennie hian tun hnai khan hla thar 'Thuneihna I ta' a tichhuak a, chart-ah a inlar nghal a ni. C. Vanlalduati leh Euphony te chu top 10-ah an lang bawk.

Hontrade International Ṭhazual Fakna Top 10
1. Amtea - Engkim ka hlan a che
2. PC Vanlalhriati (Tenu-i) - Ka hria a sin
3. Grace Lalchhanhimi - Rinin ka thlir thin
4. Felfeli Ralte - Lalpan a pui ang che
5. Stacy V.L. Muanpuii - Kan hneh zel dawn
6. Judith - Kan famkimna
7. Hlimhlimi - Min pui ang che
8. Jennie Lalruatfeli - Thuneihna I ta
9. C. Vanlalduati - Tui chunganh
10. Euphony - I tan