Nobel Prize dawng tur a hriat kim ta

American economist pahnih - William Nordhaus leh Paul Michael Romer te chu Noble Prize in Economics dawng tura thlan an ni.

Nobel Prize in Economics dawng tur hi Thawhṭanini khan Stock­holm-ah puan a ni a, Nor­dhaus leh Romer te hnehah chawimawina sang hi hlan a ni dawn ta a ni.

Nobel Prize committee chuan, William Nordhaus hian sik leh sa dang lamin chhiatna hrang hrang a thlen te zirchianna kawnga a hmalakna avangin chawimawina dawng tura thlan a nih thu an sawi. Hetih lai hian Paul Romer hi economist ten ram hmasawnna kawnga an pawimawhna zir chiang a, leilung tichhe lo zawnga hmalakna tur zirchianna lama a thawh hlawk avangin hlan a ni dawn tih an tarlang bawk.

Noble Prize dawng tur te chu
Khawvela chawimawina ngaihlut ber Noble Prize dawng tur te hi a tahtawla puan niin, tunah chuan a hriat kim ta a ni. Mi 12 te chuan he chawimawina sang hi an dawng dawn a, December 10 khian sem a ni ang.

Noble Prize in Physiology/Medicine chu American im­muno­logist James P. Allison leh Japanese immunologist Tasuku Honjo te kutah hlan a ni dawn a, chawimawina sang dawng tura puan hmasak ber an ni.

Noble Prize in Physics chu scientist pathum - Arthur Ashkin, Gerard Mourou leh Donna Theo Strickland ten an dawng dawn a, Frances H. Arnold, George P. Smith leh Sir Gregory P. Winter ten Noble Prize in Chemistry an dawng dawn thung.

Mipui ngaihlut leh dahsan ber Noble Peace Prize chu Democratic Republic of Congo mi leh sa Denis Mukwege leh Iraq hmeichhe huaisen Nadia Murad te kutah hlan a ni dawn. Denis Mukwege leh Nadia Murad te indona leh tual chhung buaina thleng avanga hmeichhia ten pawngsual an tawh ṭhin doletna kawnga hma latu an ni.

Noble Prize in Economic chu climate change zirchaingtu William D. Nordhaus leh Paul M. Romer te kutah hlan a ni dawn bawk.

Noble Prize 2018 dawng tur te :
Physiology/Medicine - James P. Allison (USA) & Tasuku Honjo (Japan)
Physics - Arthur Ashkin (USA), Gerard Mourou (France) &
Donna Theo Strickland (Canada)
Chemistry - Frances H. Arnold (USA), George P. Smith (USA) &
Sir Gregory P. Winter (UK)
Peace - Denis Mukwege (Congo) & Nadia Murad (Iraq)
Economic - William D. Nordhaus (USA) & Paul M. Romer (USA)