Leonardo DiCaprio Earth Alliance-in Australia ram kang tan $mtd 3 an pe

Leonardo DiCaprio Earth Alliance environ­mental organization chuan Australia ram kang tuarte chhawmdawlna turin $maktaduai thum an pe.

Ningani khan hemi chungchangah hian thuchhuah siamin, ram kang tuarte tana pawisa an pek thu hi an sawi a ni. An pawisa pek hi kang ṭhelh mektu  Aussie Ark, Bush Heritage, leh Wires Wildlife Rescue-te chuan an hmang dawn nia tarlan a ni.

Australia ram kang hi khawvelin a vei a, Leonardo hma hian milar zingah Chris Hemsworth, Elton John, Nicole Kidman, Keith Urban, Pink leh Metallica-te pawhin chhawmdawlna pawisa tam tham tak an lo pe tawh a, Kylie Jenner pawhin a lo pe ve tawh bawk.

Nikum September aṭanga ram kang vanga harsatna tawk tawh Australia  hian harsatna an la tawh belh zel a, mi 27 an thih tawh bakah chenna in 2000 chuang a kang chhe tawh a ni. Ram kang zawng zawng hi hectre mtd 20 vel zeta zau a ni tawh a, ramsa tluklehdingawn chuang zetin an thih phah tawh nia tarlan a ni bawk. Ramkang vanga Carbon Dioxide chhuak tawh mi tonne mtd 350 vel zet tling tawhin an chhut.