Forbes: Milar thi tawh sum lalut hnem zingah Kobe Bryant Michael Jackson erawh khum rual a la ni lo
Forbes' Highest-Paid Dead Celebrities of 2020 list-ah Basketball legend Kobe Bryant chu a lan ve a ngai ta a, a fan-te chuan hetiang dinhmuna a din hi an ring phak ngai lo a, mahse kuminah erawh he list lungchhiat thlakah hian a hming tarlan a ngai ve ta a ni.
Kobe Bryant sum lakluh zat hi $maktaduai 20 lai nia chhut niin, Forbes list-ah hian parukna a ni phak.
Thlirna kawng hrang hrang aṭanga thlirin kumin hi chu kum chhia a ni tih loh rual a ni lo. Kumtir aṭangin chanchin duhawm lo kan hre nghal a nih kha. Thla khat em pawh kan la hman ral hma, January 26 khan Basketball legend, infiamna khawvela mi ropui Kobe Bryant chu a fanu Gianna nen Calabasas tlangah helicopter chesualah an thi a, rei loteah he thu hian khawvel a dengchhuak nghal a ni. Khawvelin Bryant-te pafa a sun a, infiamna khawvel mai ni lo, khawvel pumin a sun hnuah tunah chuan Forbes' Highest-Paid Dead Celebrity list-ah te hial a hming tarlan a ngai ta.
Michael Jackson bawk a la hausa
Music legend, King of Pop Michael Jackson chu a thih aṭanga kum 10 chuang a liam hnuah pawh Forbes' Highest-Paid Dead Celebrity list-ah pakhatna a la ni thei a, $mtd 48 lai la lalutin milar thi tawh zingah sum a la lalut tam ber.
Children's author Dr. Seuss chu pahnihna niin Peanuts creator Charles Schulz chu pathumna niin golf legend Arnold Palmer, leh Elvis Presley-te'n an dawt a ni.
Legend thi tawhte sum lakluh a la tam
Kobe Bryant bakah hian Juice WRLD pawh kumin list-ah hian a la lang a, $mtd 15 zet a la lalut a ni.
Bob Marley chuan $mtd 14 a la lalut anga chhut niin John Lennon sum lakluh zat pawh $mtd 13 lai a ni bawk. List-ah hian Prince, Freddie Mercury, George Harrison leh Marilyn Monroe-te pawh an lang. Monroe hi kum 1962 daiha thi tawh kha ni mah se sum lalut tam 13-na a la ni phak a, $mtd 8 la lalut angin Forbes chuan an chhut.