BRIT Awards 2022 ; Adele a ropui ber

BRIT Awards 2022 chu Thawhlehni zanah khan sem a ni ta a, Adele chu langsar berin award pathum lai a hum haw a, award dawng tam ber a ni.

London O2 Arena-a sem BRIT Awards 2022 hi British comedian Mo Gilligan chuan a vawi khatna atan a host a, December 18 khan nominee puan chhuah tawh niin award dawng tam ber Adele pawh hi nomination hmu tam ber zinga mi a ni nghe nghe.

Kumin aṭang hian BRIT Awards hian mipa leh hmeichhe category an siam hrang loa, award nomination list-a hmeichhia an lansarh zawk ang bawkin award dawng zingah pawh hmeichhia an tam zawk. Category 15 awma pakua lai chu hmeichhia artist-te'n an la a ni.

Mimal award dawn theih zinga pakua lai chu hmeichhe lamin an dawn laiin mipa pathum chiahin mimal award an dawng ve thung.

Adele leh a award dawnte chu...
Kum eng emaw zat hla thar a tihchhuah loh hnua nikum kumtawp lama rawn come-back Adele chu BRIT awards-ah hian a rawn che na nghal viau mai.

Award ngaihven hlawh 'Artist of the Year' award a dawn bakah a hla hit 'Easy on Me' hmangin 'Song of the Year' a dawng a, a album '30' chu 'Mastercard Album of the Year' award a dawnpui bawk.

BRIT awards history-a award dawng hnem ber chu Robbie Williams niin 13 a dawng tawh a, Adele hian 12 a dawng tawh thung.

"He award hming thlak a nih chhan hi ka hrethiam a, mahse hmeichhia nih leh hmeichhe artist nih hi nuam ka ti tak zet. Kan nihna hi ka chhuang tak zet a ni," tiin Brits genderless award hmasa bera artist of the year award dawngtu chuan a sawi.

Olivia Rodrigo, Billie Eilish, Ed Sheeran, Dua Lipa-te award dawn chu
American tleirawl Olivia Rodrigo chuan a hla 'Good 4 U' chu 'International Song of the Year' award a dawnpui a, Billie Eilish chu 'International Artist' award dawngtu niin Dua Lipa chu 'Pop/R&B Act' hlan a ni ve bawk. Billie Eilish leh Dua Lipa-te hi award semna ceremony-ah an inlan thei lo a ni.

Show hawngtu 'Ed Sheeran' chuan 'Songwriter of the Year' award a dawng a, 'International Group' award chu Silk Sonic (Bruno Mars/Anderson .Paak)-te'n an dawng ve thung.

BRIT Awards 2022 winner-te:-
Artist of the Year : Adele
Group of the Year : Wolf Alice
Brits Rising Star : Holly Humberstone
Song of the Year : Adele, "Easy on Me"
Best New Artist : Little Simz
Mastercard Album of the Year : Adele, "30"
Alternative/Rock Act : Sam Fender
Hip-hop/Rap/Grime Act : Dave
Dance Act : Becky Hill
Pop/R&B Act : Dua Lipa
International Artist : Billie Eilish
International Group : Silk Sonic (Bruno Mars/Anderson .Paak)
International Song of the Year : Olivia Rodrigo, "Good 4 U"
Songwriter of the Year : Ed Sheeran
Producer of the Year : Inflo