RSL AWARDS Music exam result chhuakah Zoramchhani'n Vocal grade 8 distinction-ah a pass

RSL AWARDS Music exam result chhuakah Youth Icon star Zoramchhani chuan vocal grade 8 distinction-ah a pass.

Covid-19 hripui leng vangin kumdang angin London aṭangin examiner an kal thei loa, chuvang chuan Recorded Video Exam hmangin music exam hi kalpui a ni. Exam dan tur video kaihhruaina mumal tak zawmin an exam-na video chu khawvel hmun hrang hrang aṭangin RSL AWARDS hmunpui ber London-ah thawn a ni a, uluk taka endik a nih hnuah result puan a ni.

India ramah pawh state eng emaw zat aṭangin exam an ṭhahnem hle a, Mizoram aṭang hian music school 11 (Aizawl 7; Champhai 2, Keifang 1, Serchhip 1) a zirlai 40-te'n exam an hmachhawn a ni. Exam zingah Youth Icon aṭanga zaithiam hriat hlawh tak Zoramchhani pawh telin vocal grade 8 distinction-ah pass-in mark 95/100 lai a hmu.

RSL Awards hi 1991 a din a ni a, Music grade exam (electric guitar, bass, drums, acoustic guitar, piano, vocals, music production, music theory) bakah Performance Arts (Musical theatre, acting, screen acting, jazz dance, street dance); Vocational (schools, colleges, training providers, music practitioners, creative music industry, creative digital media, creative practitioners, creative industries practitioners)-te a zir theih. Tunah hian khawvel ram 45-ah inzar pharhin kum tin mi 80,000 chuangin an hnuaiah heng exam chi hrang hrang hi an hmachhawn ṭhin.

Zothanmawia, Local Area Representative (LAR) RSL Awards chuan,"RSL Awards-in a tum ber chu thiamna pawmawm leh hmantlak, ramdang pawhin an pawmpui theih khawvel hmun hrang hrang, ram kilkhawr zawk thleng pawha chhawr theih leh ban phak, chhawp chhuah a, midang zirtir leh thiamna pek hi a ni. Aizawl bakah Champhai, Keifang, Serchhip lam aṭanga exam hmachhawn eng emaw zat an awm thei ta hi music lama hmasawnna duhawm tak a ni," tiin a sawi.