2022 Polar Music Prize dawngtu tur Iggy Pop

Iggy Pop chuan 2022 Polar Music Prize a dawng dawn.

May 24 hian Stockholm's Grand Hotel-ah he chawimawina hi hlan a ni dawn a, kum 74 mi Grammy award hial pawh lo dawng tawh Iggy Pop chawimawina dawn tur hian Swedish Kroner maktaduai 1 a keng tel a ni.

'The Godfather of Punk' ti hiala an sawi ṭhin Pop chuan Polar Music Prize a dawng tur chu a lawm hle tih sawiin zahawm a tih bakah a ngaihhlut thu a sawi. May-a Stockholm kal hlan pawh a nghakhlel tawh hle tih a sawi bawk.

Polar Music Prize hi rimawi khawvela mi langsar tak takte'n an lo dawng tawh a, Sir Paul McCartney, Bob Dylan, Sting leh Joni Mitchell-te hnenah pawh hlan a lo ni tawh a ni.

Polar Music Prize hi Swedish award niin Nobel Prize of Music tihte pawhin an sawi ṭhin a, kum 1989 khan Swedish pop icon ABBA manager ṭhin Stig Anderson chuan bulṭanin Beatles legend McCartney chu he chawimawina dawng hmasa ber a ni nghe nghe.