DJ-i musical film & audio album 'Ni Thar Duhawm' Zaninah tlangzarh a ni dawn ta

Zaithiam DJ Lalvenhimi musical film & audio album 'Ni Thar Duhawm' chu zanin dar 8:00 hian Vanapa Hall-ah tlangzarh a ni dawn ta.

Musical film leh audio album hi a ruala tlangzarh a ni dawn a, a changtu zinga mi Adama chuan a host dawn a ni. Release zawh hnu hian film hi chhuah nghal a ni dawn a, ticket Rs.100, 200 leh Rs.300 man siam a ni.

Film kalphung
'Ni Thar Duhawm' hi Mizo-in kan la hmuh zen zen loh musical film a ni a, shooting hi June thla khan ṭan a ni.

MZU Campus, Durtlang, Lengpui, Tanhril, Chawlhhmun leh Aizawl hmun hrang hrangah shooting hi neih a ni a, September thla tawp lam khan zawh fel niin, Dinagraphix kutchhuak a ni.

DJ Lalvenhimi chu a chang­tunu ber niin, a taka thil thleng behchhana siam a ni. He film-ah hian hla mawi tak tak pariat a awm dawn bawk a, en manhla tur tak a ni.

A changtu lam hi...
DJ Lalvenhimi chanpuite hi film khawvela kan hmelhriat sate an ni nawk a, chung zingah chan Chanmari duo - Adama leh Hruaia Sailo te pawh an tel.

Anni pahnih chetla vel ringawt pawh hi en chakawm tak a ni. Lam lama sulhnu nei ṭha ber te zinga mi Alan Rinawma, Mizo Dance Camp (MDC) leh a nauten an puibawm bawk.

DJ-i'n kum thum chhung vel zet a lo sual tawh he musical film hi en manhla tur tak a ni a, zaninah a vawi khat nan chhuah a ni ang.

Audio album
DJ-i hian musical film a buai­pui avang hian music video lam pawh a buaipui hman meuh lo a, tunah erawh a hlawhtlinna hmuh tur a awm dawn ta. Film a buaipui karah hian audio album a khawrpum bawk a ni.

A film hming ang bawkin a audio album pawh title pawh hi 'Ni Thar Duhawm' tih a ni a, hla thar ṭhiau 11 a awm. Heng hlate hi Kings & Prophets Studio leh EME Records-ah te recording tih a ni a, musician lar tak takte kuthnu a awm bawk.

Mizo zaithiam zinga hriat hlawh leh sawm hlawh berte zinga mi DJ Lalvenhimi musical & audio album 'Ni Thar Duhawm' hi pawl leh mimal angin sum tuak nan hman theih niin, booking ti duh tan - 87946 45115 ah biak theih a ni.