Britain mite rom-com ngainat ber Notting Hill
BBC Radio 2 chuan Valentine's Day pualin ngaithlatute hnenah poll siamin an romatic comedy film ngainat ber an thlan tir a, kum 1999-a tlangzarh tawh 'Notting Hill' chu kum 2022-ah pawh an ngainat ber a la ni tlat.
'Notting Hill' film hi May 21, 1999 khan tlangzarh a ni a, Julia Roberts leh Hugh Grant-te channa niin British film sum lalut tam berte pawh a lo ni tawh a ni. $mtd 42 vel senga an siam film hian $mtd 363.9 lai Box Office aṭangin sum a lalut thei a, he film hi critics lam pawhin an fak rawn a ni ber. Kum 20 chuang a ral hnuah pawh BBC Radio 2 ngaithlatute rom-com film ngainat ber a la ni hem mai.
BBC Radio 2 hian ngaithlatute film duh zual 20 an tarlang a, 'Notting Hill' tih loha an ngainat ber pawh Julia Roberts channa tho 'Pretty Woman' kha a ni. He film phei hi chu kum 30 liam ta, kum 1990-a tlangzarh daih tawh kha a ni.
Hugh Grant channa film pathum lai top 5-ah a lang ve bawk a, 'Four Weddings and a Funeral' chu palina niin 'Bridget Jones's Diary' chu pangana a ni ve bawk. Movie critic James King chuan,"Radio 2 ngaithlatute chuan Julia Roberts leh Hugh Grant-te chu rom-com queen leh king crown an khumtir a ni," tiin a sawi hial.
BBC Radio 2 poll siamah hian kum 80 liam ta chhunga rom-com film hrang hrang thlan a ni a, top 20-ah hian Audrey Hepburn channa kum 1961-a tihchhuah tawh 'Breakfast at Tiffany's' te pawh langin kum 1959 daih tawha tlangzarh tawh Marilyn Monroe, Tony Curtis leh Jack Lemmon-te channa 'Some Like It Hot' -te pawh kha a lang a ni.
Top 20 list-ah chuan tunhnai kum 10 chhunga film tlangzarh lang a awm loa, Kum 2011-a tlangzarh 'Crazy Stupid Love' chu list-a lang zingah hnaivai berin 14-na a ni a, kum 2009-a tlangzarh '500 Days Of Summer' chu 16-na a ni bawk.
BBC Radio 2 ngaithla ṭhinte rom-com film ngainat zual 10-te chu:-
1. 'Notting Hill' 1999
2. 'Pretty Woman' 1990
3. 'When Harry Met Sally' 1989
4. 'Four Weddings And A Funeral' 1994
5. 'Bridget Jones's Diary' 2001
6. 'Sleepless In Seattle' 1993
7. '10 Things I Hate About You' 1999
8. 'The Princess Bride' 1988
9. 'Some Like It Hot' 1959
10. 'The Wedding Singer' 1998