'Foreigner' dintu zinga mi Ian McDonald a thi

British-American rock band lar tak ṭhin 'Foreigner' dintu zinga mi Ian McDonald chu kum 75 mi niin Nilaini khan New York-a a chenna inah cancer vangin a thi.

Ian McDonald hian rimawi khawvelah sulhnu a hnutchhiah ṭha hle a, 'Foreigner' band an din hma hian British progressive rock band lar tak 'King Crimson' dintu zingah a tel bawk a ni.

'King Crimson' hi studio album pahnih a tihchhuahpui a, an tihchhuah hmasak 'In the Court of the Crimson King' phei chu UK chart-ah No.5-te hial a ni phak a, US chart lamah 28-na a ni pha bawk. Live album leh compilation album phei chu a tihchhuahpui hnem hman hle.

'Foreigner' kha album pathum a tihchhuah pui a, US leh UK album chart-ah chung album-te chu an che ṭha hle a, US album chart top 5-ah a hunlai chuan a lang vek a ni.

Amah hi multi-instrumental musician a ni a, saxophonist a nih bakah keyboard, flute, vibraphone leh guitar-te pawh a play ṭhin.