Cycle4Change Challenge Aizawl-ah an nei

Aizawl Smart City Ltd. huaihawt Cycle Rally chu Inrinni zing dar rukah khan Aizawlah neih a ni.

He Cycle Rally hi India Cycles4Change Challenge intihsiakna kal zel atana Aizawl Smart City leh Mizoram Cycling Association, Aizawl Municipal Corporation leh Aizawl Traffic Police te tangrual hmalakna niin, Chhangurkawn, Luangmual atangin Mizoram University, Tanhril thleng an tlan.

India Cycles4Change Challenge hi Ministry of Housing and Urban Affairs (MoHUA), Swachh Bharat, Fit India, Institute for Transport and Development Policy (ITDP) leh Smart Cities Mission tangkawpin an buatsaih a ni.

A tum ber chu Covid-19 hrileng karah mipuite kan him zawk nan leh hrisel zawk nan cycle khalh uar nise tih niin, Sikul leh pisa kai nan te, veivah nan te, leilung leh mihring kan lo hrisel zawk nan cycle khalh uar sauh sauh turin mipui an chah.

Cycles4Change Challenge-ah hian India ram Smart City-te, State khawpui hrang hrang leh khawpui, mihirng nuai nga tling chin an tel a ni.

Cycle Rally neih hma hian slogan inziahsiak lawmman sem nghal niin, "Pedal towards a healthier city" tih chu rally slogan atan thlan a ni bawk.