Warner Bros.-in 'Aquaman and the Lost Kingdom' footage hmasa ber an pho chhuak

Warner Brothers chuan Zirtawpni liam ta khan social media lamah video clip tawite an pho chhuak a, chutah chuan 'Aquaman and the Lost Kingdom' footage hmasa ber hmuh tur a awm bakah 'Black Adam' leh 'The Flash' clip thar an pholang a, 'The Batman' pawh an clip-ah chuan hmuh tur a awm.

'Aquaman and the Lost Kingdom' hian thawm a neihna a rei tawh a, video footage erawh hmuh tur a la awm ngai lo. Zirtawpni khan Warner Bros. chuan an rawn pho lang ve ta a, mahse han sawi zui tur chiam erawh a tam lo. Jason Momoa ruam (valley) bula a dinglai leh Aquaman lal ṭhutthlenga a ṭhu lai tawite bak a lang lo.

He film hi December 16, 2022-a tlangzarh turin ruahmanna an siam a, Amber Heard, Willem Dafoe, Patrick Wilson, Dolph Lundgren, Yahya Abdul-Mateen II, Temuera Morrison, leh Nicole Kidman-te pawh an inlan leh dawn a ni. Nikum June thlaah khan an chang ṭan tawh a, kumin January thlaah khan an chang zo fel tawh bawk.

Film dang hlimthla chu
Dwayne Johnson channa 'Black Adam' footage-ah erawh thil thar eng emaw zat hmuh tur a awm. Justice Society of America: Doctor Fate (Pierce Brosnan), Hawkman (Aldis Hodge), Atom Smasher (Noah Centineo) leh Cyclone (Quintessa Swindell)-te chu a vawi khatna atan pholan an ni. He film-ah hian Marwan Kenzari, James Cusati-Moyer, Bodhi Sabongui, Mo Amer leh Uli Latukefu-te pawh an chang a, July 29 hian tlangzarh an tum.

'The Flash' footage thar pawh an pho chhuah zingah hian a tel. Ezra Miller 'Flash' suit thar hmuh tur a awm a, Michael Keaton 'Batman' aw hriat tur a awm bawk. He film hi November 4-a tlangzarh tura an ruahman a ni a, 'Flashpoint Paradox' nen a inzul viau dawn niin a lang.

March 4-a tlangzarh tur Robert Pattinson leh Zoë Kravitz-te channa 'The Batman' footage kan hmuh tawh hnu kha an rawn zep tel leh bawk. 'The Batman' hi miin an enchak tawh a, March 1-a Imax theatre 350-a an chhuah tur ticket an zawrh pawh an hralh zo chak hle a ni.