'Marry Me' film-a J.Lo 'gown' hak rih zawng chu...

Zirtawpni liam ta khan Jennifer Lopez film channa thar ber 'Marry Me' chu US-ah tlangzarh a ni a, chu film-a Jennifer Lopez gown hak chu pound 95 laia rit a ni hem mai!

He film-ah hian kum 52 mi lemchan thiam leh zaithiam ni bawk Jennifer Lopez hi Kat Valdez lemah a chang a, Maluma character 'Bastian' nena an inneih dawna a mo kawr hak chu a rit lutuka, an buaipui deuh laih laih a ni awm e. Costume Designer Caroline Duncan chuan Variety hnenah hemi chungchang hi sawiin,"Kha thawmhnaw kha pound 95 laia rit a ni a, mi panga laiin an kenkual a ngaih bakah Jennifer-i'n a hak a, a phelh dawn pawhin mi panga chuan an buaipui zel a ngai a ni," a ti.

'Marry Me' film hi romantic comedy a ni a, nikum February thlaa tlangzarh an tum tawh kha niin Covid-19 vangin an sawn hla zel a, Zirtawpni khan an tlangzarh ta chauh a ni. Film siamna atan $maktaduai 23 lai an seng nghe nghe. He film chungchangah hian film review-tute ngaihdan a inchen loa, Rotten Tomatoes lamah critics 134-in an review aṭangin ratings 5.5/10 a hmu a ni.