Duh lotu tam tak chhanglet thiam Amber Heard

A pasal hlui Johnny Depp chu 'Fantastic Beasts 3' a chang tawh lo tura tih a nih hnu lawk khan mi tam tak chuan Warner Bros. hotute hnenah petition ziakin Amber Heard chu 'Aquaman 2'-a inlan tura an duh tawh loh thu an ziak a, hetiang karah hian Amber Heard chuan Aquaman chhunzawmnaah Mera lemah a chang leh dawn tih a sawichiang ve leh ngat thung.

'Aquaman 2'-a a chan tawh lohna tura ngenna petition ziaktu hi maktaduai an tling hial.

An inneih lai leh an inṭhen hnu pawha thubuai ngah zui tak Johnny Depp leh Amber Heard-te chanchin hi entertainment khawvel chuan a la ngaihven chhunzawm zel dawn niin a lang. Amber Heard-in Depp-a'n kut a thlak nia a sawi hnu khan The Sun chanchinbu editor chuan a chanchin an ziahnaah 'wife-beater' tiin a ziak a, hemi chungchang thubuaiah hian Johny Depp hi a chak lo zui a ni. Hemi hnu hian Depp hi 'Fantastic Beasts 3'-a inlan zui tawh lo tura tih a ni bawk.

Depp fan lungawi lote chuan Ningani liam ta thleng khan  "Remove Amber Heard from 'Aquaman 2' " petition ziakin signature maktaduai chuang a awm tawh a, hetiang karah hian Entertainment Weekly hnenah Amber Heard chuan DC movie-ah hian a kir leh dawn tih a sawi chhuak ve ngat a ni.

Aquaman-in fan a ngahzia leh an ngainatzia a hmuh chuan a tiphur hle tih sawiin an lokir leh ngei dawn tih a sawi a, film chan pawh phurawm a tih tawh thu a sawi.

Social media-a paid rumor leh paid campaign chuan a tak takah chuan awmzia a nei lo tih sawiin, 'Aquaman' leh 'Aquaman 2' a taka chantirtu chu fan-te chiah an ni, nakkuma chan ṭan leh hlan pawh ka nghakhlel hle, a ti.

Hetiang karah hian kum 34 mi Amber Heard hi a pasal hlui nena an thubuaiah hian a la fihlim lo thung. Nikum-a Washington Post article-a  Depp-a'n kut a thlak tih tarlan a nih hnu khan thubuai an la nei zui char char a, Depp hian a nupui hlui hi kut a thlak lo tih sawi ve thungin a libel case chungchanga U.K. court thutlukna pawh kha appeal leh a la tum hle.