Super Bowl Halftime Show

uper Bowl LVI halftime show hun a thleng a, khawvelin SoFi Stadium, Inglewood, California lam a hawi. Mixing desk lian tak hmaah rapper leh super-producer Dr Dre a rawn lang a, second tam a liam hman lo, hip hop khawvelin a hai theih loh aw ngei mai chuan hip hop khawvela hla thluk leh thu hai rual loh 'La-da-da-da-dah/It's the one and only D-O-double-G' a rawn thlawh! Snoop Dogg ngei mai chu! Thawm a ring nghal hle.

Dr Dre leh Snoop Dogg-te hian 'The Next Episode' leh 'California Love' an perform dun zui a ni.

Chutah puanzar lawk loh, a inlan dawn tih khawvelin a hriat lawk loh rapper 50 Cent chu beisei loh takin a letling zawnga inkhaiin a rawn rap heu! Ani hian 'In Da Club' hmangin Super Bowl Halftime Show thlirtute a awi. A duh tawka stage a mawi hnuah Mary J. Blige chuan a hla hit em em mai 'Family Affair' hmangin stage a rawn mawi a, 'No More Drama' a sak chhunzawm bawk.

Mary J. Blige inlan zawhah hian Kendrick Lamar chuan 'M.A.A.D City' hmangin performance hmuhnawm tak a rawn lantir. Lamar hian 'Alright' hmangin stage luah chhunzawmin chutah le, rap goat Eminem ngei mai chu 'Forgot About Dre' hmangin a rawn inchhir lut ta. A kiangah Dr Dre hmuh tur a awm a, stage-ah musician an rawn lang a, beisei loh takin Anderson .Paak chuan a tihdan phung pangngaiin nuam tih hmel takin drums a lo vua.

Eminem a ṭhingṭhi ta!
Eminem rawn inlan chiah khan thawm a ring bik emaw tih tur a ni a, a 'Lose Yourself' a perform zawhah a ṭhingṭhi zui a, hei hian sawi zui a hlawh viau. NFL player Colin Kaepernick a thlawpna a ni nge ni lo Eminem hian a sawi hran loa, mahse Black Lives Matter movement leh Colin Kaepernick a thlawpna a ni ngei ang tih a rin theih.

Dr. Dre, Snoop Dogg, Kendrick Lamar, Eminem, Mary J. Blige, leh 50 Cent-te chuan 'Still D.R.E' hmangin show an khar a ni. He show ropui tak hi minute 14 pawh tling loah an tlingtla hman vek a ni.

Super Bowl Halftime Show chhehvel
Pepsi Super Bowl LVI Halftime Show hi a zawna a kum thumna atan rapper Jay-Z company Roc Nation chuan a co-produce leh a, hip-hop music-in Super Bowl Halftime Show an thunun vawi khatna a ni.

Basketball player LeBron James chuan,"Half-time show ka hmuh tawha la ropui ber a ni," tiin social media-ah a sawi hial a, mi tam takin LeBron James hi an ṭawmpui ngei pawh a rinawm.

Eminem ṭhingṭhi kha...
Mingo inlan hmuh tur awm mang lohna (performer, musician leh side dancer-te zingah) Super Bowl LVI Halftime Show-ah mingo hmuh tur langsar ber rap legend Eminem a ṭhingṭhi a, hei hi khawvelin a ngaihven hle. Report ṭhenkhata tarlan a nih dan chuan Eminem leh artist dangte hi NFL lam chuan thil sawizui hlawh leh inhnialna chawk chhuak thei ti lo turin an ngen a, mahse Eminem hi stage-ah langsar takin a ṭhingṭhi ta tho a ni. NFL lam erawh chuan he report hi an pha thung a, league thupuangtu Brian McCarthy chuan,"Rehearsal vawi eng emaw zat an neihah thil thleng tur zawng zawng kan en vek a, Eminem khan a ti dawn tih kha kan hre lawksa," tiin a sawi.