Super Bowl Weekend-a roreltu 'Death on the Nile'
Super Bowl Weekend Box Office-ah 'Death on the Nile'-in sum a lalut tam ber a, kar hmasa lama sum lalut tam ber 'Jackass Forever' chu pahnihna niin 'Marry Me' chu pathumna a ni thung.
'Death on the Nile' a luang chhuak hnem
Pathianni kha Super Bowl vawi 56-na a nih avangin US lamah chuan cinema en tura cinema hall pan an tlem deuh niin sawi mah se Gal Gadot channa 'Death on the Nile' chuan kar tawp liam ta chhung khan North America Box Office aṭangin $12,891,123 lai sum a lalut tho.
'Death on the Nile' hi kum 1937-a tihchhuah Agatha Christie novel ziah behchhana siam niin kum 2017-a tihchhuah tawh 'Murder on the Orient Express' chhunzawmna a ni a, film star lar tak tak- Annette Bening, Russell Brand, Ali Fazal, Dawn French, Gal Gadot, Armie Hammer, Rose Leslie, Emma Mackey, Sophie Okonedo, Jennifer Saunders, leh Letitia Wright-te an chang a ni.
He film siamna atan hian budget pawh a sang a, $mtd 90 lai an seng a, US pawn lamah $20,917,153 lalut tawh bawkin ram hrang hrang Box Office aṭanga a sum lakluh tawh belhkhawm chu $33,808,276 a tling tawh.
'Death on the Nile' chungchangah hian film review-tu lam ngaihdan a inang lo hle a, Rotten Tomatoes lamah chuan critics 295 laiin an review-na aṭangin rating 6.1/10 a hmu a ni.
'Marry Me' ve thung
Nikum February thlaa tlangzarh tura an ruahman tawh, Covid-19 vanga an sawn hlat zel avanga an tlangzarh lawk theih loh Jennifer Lopez leh Owen Wilson-te channa 'Marry Me' chu Zirtawpni liam ta khan US-ah tlangzarh a ni ta a, Box Office-ah pathumna niin threatre 3,642 aṭangin $7,949,980 a lalut a, 'Jackass Forever' lakluh zat $8,081,889 a phak lo deuh thung. He film hian Rotten Tomatoes lamah rating 5.5/10 a hmu a ni.
Top 5-a film thar dang 'Blacklight'
Liam Neeson channa 'Blacklight' chuan 'Spider-Man: No Way Home' a tluk phak loa, sum lalut tam pangana a ni. He film hian critics lam lung a dum vak loa, an dim lo hle. Rotten Tomatoes lamah pawh rating 3.6/10 chiah a hmu a ni.
Film thar dang
Top 5-a film thar pathum lang bak hi chu film thar che ṭha tehlua dang a awm lo. Box Office Mojo chart-ah film 46 tarlan a ni a, chung zinga 'Catch the Fair One' (34), 'Fabian: Going to the Dogs' (37) leh 'Indemnity' (44)-te chu film thar a ni bawk.